Read Pennsylvania German 1. Chronik 16 Bible Online

1. Chronik 16 - Pennsylvania German bible

1. Chronik 16

¹Si henn di Bundes-Lawt funn Gott rei gebrocht in da tent es da Dawfit uf gedu katt hott fa see, un henn brand-opfahra un dank-opfahra gopfaht fannich Gott.

²Vo da Dawfit faddich voah brand-opfahra un dank-opfahra macha, hott eah di leit ksaykend im HAH sei nohma.

³No hott eah en layb broht, en shtikk flaysh un en boddel vei gevva zu alli mann un fraw in Israel.

⁴Eah hott samm funn di Lefiddah eiksetzt fa deena fannich di Bundes-Lawt fumm HAH. Si henn sella preis, dank un lohb gevva zumm HAH, da Gott funn Israel.

⁵Dee mennah voahra: Da Asaph, da evvahsht; da Sacharia da zvett evvahsht, no voah's da Jeiel, da Semiramoth, da Jehiel, da Matthithia, da Eliab, da Benaia, da Obed-Edom un da Jeiel mitt grohsi un glenni harfa, un da Asaph mitt cymbals.

⁶Di preeshtah Benaia un Jahasiel henn sella di blohs-hanna blohsa fannich di Bundes-Lawt funn Gott di gans zeit.

⁷Sellah dawk hott da Dawfit's eahsht moll em Asaph un sei freindshaft dess dank-leet zumm HAH gevva:

⁸Gevvet dank zumm HAH, un roofet sei nohma oh; fakindichet unnich di heida vass eah gedu hott.

⁹Singet zu eem, yau, singet un preiset een; sawwet veyyich awl sei vundahboahri verka!

¹⁰Hallichet sei heilichah nohma; losset di hatza funn selli es da HAH sucha sich froiya.

¹¹Suchet da HAH un sei graft; suchet sei ksicht immah.

¹²Denket an di vundahboahri verka es eah gedu hott, un an di zaycha un gerichta aus seim maul.

¹³Oh diah sohma funn Israel, Gott sei gnecht, diah kinnah fumm Jakob, sei raus-groofeni.

¹⁴Eah is da HAH unsah Gott; eah richt in di gans veld.

¹⁵Denket an sei bund fa'immah, es vatt es eah gevva hott fa en dausend layves-zeida,

¹⁶sell bund es eah gmacht hott mitt em Abraham, un vass eah kshvoahra hott zumm Isaac.

¹⁷Eah hott's gezeikt un fesht gmacht zumm Jakob fa en adning, un zu Israel fa en ayvich bund,

¹⁸un hott ksawt, “Ich gebb eich's land funn Kanaan, es es dayl fa eiyah eahbshaft.”

¹⁹Vo si noch vennich voahra in nambah, un fremd voahra im land,

²⁰sinn si rumm gloffa funn aym folk zumm anra, un funn aym kaynich-reich zumm anra.

²¹Eah hott nimmand glost si nunnah dredda; fa iahra sayk hott eah kaynicha gezankt,

²²un hott ksawt, “Layyet di hand nett uf mei ksalbdi; doond kenn shawda zu mei brofayda.”

²³Singet zumm HAH, alli lendah, breddichet sei saylichkeit alli dawk.

²⁴Fazaylet veyyich sei hallichkeit unnich di heida, un veyyich sei vundahboahri verka unnich awl di leit.

²⁵Da HAH is grohs, un is es veaht fa glohbt sei; un eah soll kfircht sei ovvich alli gettah.

²⁶Fa awl di gettah funn di heida sinn abgettah, avvah da HAH hott di himla gmacht.

²⁷Hallichkeit un kaynich-eah sinn fannich eem; graft un fraylichkeit sinn in seim tempel.

²⁸Gevvet zumm HAH, awl diah leit funn di heida, gevvet hallichkeit un graft zumm HAH,

²⁹gevvet zumm HAH di hallichkeit es zu sei nohma heaht; bringet en opfah un kummet fannich een; lohvet da HAH in seim heilicha glitz.

³⁰Di gans veld soll ziddahra fannich eem! Di eaht is fesht gegrund, un kann nett gmooft sei.

³¹Losset di himla sich froiya, un di eaht fraylich sei; loss si sawwa zu di heida, “Da HAH is kaynich!”

³²Losset da say roahra, un alles es drinn is; losset di feldah fraylich sei, un alles es drinn is!

³³No doon awl di baym im bush singa, si singa mitt frayt fannich em HAH, fa eah kumd fa di eaht richta.

³⁴Gevvet dank zumm HAH, fa eah is goot; sei shtandhaftichi-leevi bleibt fa'immah.

³⁵No sawwet, “Mach uns saylich, oh Gott, unsah Heiland; fasammel uns un mach uns frei funn di heida, so es miah dei heilichah nohma danka, un dei hallichkeit lohb gevva.”

³⁶Lohb sei zumm HAH, da Gott funn Israel, funn ayvichkeit zu ayvichkeit. No henn awl di leit ksawt, “Amen” un “Lohb sei zumm HAH.”

³⁷Da Dawfit hott da Asaph un sei freindshaft datt glost fannich di Bundes-Lawt fumm HAH fa datt deena di gans zeit, so vi's sich kfoddaht hott alli dawk.

³⁸Eah hott aw da Obed-Edom un sex un achtzich funn sei freindshaft datt glost fa deena mitt eena. Da Obed-Edom, em Jedithun sei boo, un da Hosea voahra doah-heedah.

³⁹Da Dawfit hott da preeshtah Zadok un aw di preeshtah es in sei freindshaft voahra in Gibeon glost. Datt voahra si fannich em fasamling-tent uf em hohcha blatz

⁴⁰fa brand-opfahra brenna zumm HAH uf em brand-opfah awldah alli dawk, meiyets un ohvets. Dess voah fa alles ausdrawwa vass kshrivva is im Ksetz fumm HAH es eah gevva hott zu Israel.

⁴¹Bei eena voah da Heman un da Jedithun, un aw di anra es groofa voahra un es gnohmd voahra. Si voahra datt fa da HAH danka veil sei shtandhaftichi-leevi ayvichlich is.

⁴²Da Heman un da Jedithun voahra di ivvah-saynah fumm singes un shpeeles mitt di blohs-hanna un cymbals un anri sacha es gyoost voahra fa singa zu Gott. Em Jedithun sei boova voahra di doah-heedah.

⁴³No sinn awl di leit zu iahra haymeda ganga un da Dawfit is haym ganga fa sei family saykna.