Read Pennsylvania German 1. Chronik 22 Bible Online

1. Chronik 22 - Pennsylvania German bible

1. Chronik 22

¹No hott da Dawfit ksawt, “Do soll's haus funn Gott da HAH sei, un aw da awldah fa brand-opfahra macha fa Israel.”

²No hott da Dawfit en gebott gevva es awl di auslendah es im land funn Israel voona, sella zammah kumma. Un eah hott shtay-mayslah an di eahvet gedu fa shtay hakka fa's haus funn Gott bauwa.

³Eah hott feel eisa bei grikt fa nekkel macha fa di doahra vo ma nei gayt un fa di doah hinges un latches. Un eah hott so feel bronze grisht es es nett meeklich voah fa's veeya.

⁴Eah hott aw so feel cedar blekk bei grikt es si nett gezayld sei henn kenna, veil di leit funn Sidon un Tyrus feel cedar-hols zumm Dawfit gebrocht henn.

⁵Da Dawfit hott ksawt, “Mei boo da Solomon is yung un noch nett kshikt in demm, un's haus es gebaut vatt fa da HAH muss grohs un shay sei, un's soll en grohsah nohma havva in alli lendah. Fasell fang ich oh rishta difoah.” So hott da Dawfit feel sacha grisht eb eah kshtauva is.

⁶No hott eah sei boo da Solomon bei groofa un hott eem en gebott gevva fa en haus bauwa fa da HAH, da Gott funn Israel.

⁷Da Dawfit hott ksawt, “Mei boo, ich habb's in meim hatz katt fa en haus bauwa, fa da Nohma fumm HAH mei Gott eahra.

⁸Avvah's vatt fumm HAH is zu miah kumma un hott ksawt, ‘Du hosht feel bloot fagossa un hosht grohsi greeya kfochta. Du solsht kenn haus bauwa fa mei Nohma, veil du so feel bloot fagossa hosht uf di eaht fannich miah.

⁹Avvah en boo soll geboahra sei zu diah es en mann sei zayld funn fridda un roo. Ich gebb eem roo funn sei feinda uf alli seit. Sei nohma soll Solomon sei, un ich gebb fridda un roo zu Israel so lang es eah laybt.

¹⁰Eah soll en haus bauwa fa mei Nohma. Eah zayld mei boo sei, un ich zayl sei faddah sei. Ich zayl sei kaynich-shtool ivvah Israel setza fa'immah.’

¹¹Nau, mei boo, da HAH zayld bei diah sei, un zayld diah helfa en haus bauwa fa da HAH dei Gott, so vi eah ksawt hott es eah zayld.

¹²Un da HAH gebt diah veisheit un fashtand vann eah dich ivvah Israel setzt, so es du's ksetz fumm HAH dei Gott haldsht.

¹³No macht eah di sacha goot ausshaffa fa dich, vann du acht gebsht un di gebodda un adninga haldsht es da HAH em Mosi gevva hott veyyich Israel. Sei shteik unni angsht; feich dich nett un faliah nett moot.

¹⁴Nau gukk moll, ich habb hatt kshaft fa's sach bei greeya fa da tempel fumm HAH bauwa—nayksht fiah dausend ton gold, un fatzich dausend ton silvah, un so feel eisa un bronze es es nett meeklich is fa's veeya. Ich habb aw hols un shtay grisht, un du brauchsht fleicht noch may greeya.

¹⁵Du hosht aw feel shaff-leit: shtay-hakkah, shtay-uflayyah, shreinah un leit es goot sinn an alli satt eahvet.

¹⁶Es sinn leit unni nambah es shaffa kenna mitt gold, silvah, bronze un eisa. Nau fang oh mitt di eahvet, un da HAH zayld bei diah sei.”

¹⁷No hott da Dawfit en gebott gevva es awl di evvahshta funn Israel seim boo da Solomon helfa sella.

¹⁸Eah hott ksawt zu eena, “Is nett da HAH eiyah Gott mitt eich? Un hott eah eich nett roo gevva uf alli seit? Eah hott di leit in demm land ivvah-gevva in mei hand, un's land is nau unnich em HAH un sei leit.

¹⁹Nau setzet eiyah hatz un sayl fa da HAH eiyah Gott sucha. Fanget oh da tempel fumm Gott da HAH bauwa, so es diah di Bundes-Lawt fumm HAH, un's heilich ksha funn Gott in da tempel bringet es gebaut sei zayld fa da Nohma fumm HAH.”