Read Pennsylvania German 1. Chronik 23 Bible Online

1. Chronik 23 - Pennsylvania German bible

1. Chronik 23

¹Vo da Dawfit ald un foll yoahra voah hott eah sei boo da Solomon kaynich gmacht ivvah Israel.

²Eah hott awl di evvahshti ivvah Israel, un aw di preeshtah un Lefiddah zammah ksammeld.

³Di Lefiddah es dreisich yoah ald un eldah voahra, voahra gezayld, un alles zammah voahra's acht un dreisich dausend.

⁴“Fiah un zvansich dausend funn dee sella di eahvet ivvah-sayna im haus fumm HAH,” hott da Dawfit ksawt. “Sex dausend funn eena sella evvahshti un richtah sei.

⁵Fiah dausend sella doah-heedah sei, un fiah dausend sella lohb singa mitt harfa un blohs-hanna, dee sacha es ich gevva habb fa lohb singa mitt.”

⁶Da Dawfit hott di Lefiddah fadayld in drubba noch em Levi sei boova, da Gerson, da Kahath un da Merari.

⁷Di Gersoniddah voahra da Laedan un da Simei.

⁸Em Laedan sei boova voahra da Jahiel, da evvahsht, da Getham un da Joel—drei alles zammah.

⁹Em Simei sei boova voahra da Salomith, da Hasiel un da Haran—drei alles zammah. Dee voahra di evvahshta funn di families fumm Laedan.

¹⁰Em Simei sei boova voahra da Jahath, da Sina, da Jeus un da Beria. Dee voahra em Simei sei boova—fiahra alles zammah.

¹¹Da Jahath voah da eahsht un da Sina da neksht, avvah da Jeus un da Beria henn nett feel boova katt so voahra si gezayld es ay family.

¹²Em Kahath sei boova voahra da Amram, da Jizhar, da Hebron un da Usiel—fiahra alles zammah.

¹³Em Amram sei boova voahra da Aaron un da Mosi. Da Aaron un sei nohch-kummashaft voahra raus ksetzt fa'immah fa di alli heilichshta sacha heilich halda, fa insens brenna zumm HAH, un fa een deena un sei nohma saykna fa'immah.

¹⁴Avvah veyyech em Mosi, da mann funn Gott, sei boova voahra gezayld es en dayl funn di shtamm fumm Levi.

¹⁵Em Mosi sei boova voahra da Gersom un da Elieser.

¹⁶Em Gersom sei boo voah da Sebuel, da evvahsht in di family.

¹⁷Em Elieser sei eahshtah boo voah da Rehabia. Da Elieser hott kenn anri boova katt, avvah da Rehabia hott feel katt.

¹⁸Em Jizhar sei eahshtah boo voah da Salomith.

¹⁹Em Hebron sei boova voahra da Jeria, da eahsht; da Amaria, da zvett; da Jahasiel, da dritt; un da Jakmeam, da fiaht.

²⁰Em Usiel sei boova voahra da Micha, da eahsht, un da Jissia, da zvett.

²¹Em Merari sei boova voahra da Maheli un da Musi. Em Maheli sei boova voahra da Eleasar un da Kis.

²²Da Eleasar is kshtauva un hott kenn boova katt. Eah hott yusht mayt katt. So henn iahra cousins, em Kis sei boova, si keiyaht.

²³Em Musi sei boova voahra da Maheli, da Eder un da Jeremoth—drei alles zammah.

²⁴Dess voahra di nohch-kummashaft fumm Levi bei iahra families—di evvahshti funn en family freindshaft vi si gnambaht voahra bei nohma. Yaydahs funn eena hott missa zvansich yoah ald sei eb eah im HAH sei haus shaffa hott kenna.

²⁵Da Dawfit hott ksawt, “Da HAH, da Gott funn Israel, hott sei leit roo gevva, un eah bleibt in Jerusalem fa'immah.

²⁶Nau braucha di Lefiddah da tempel-tent nimmi rumm drawwa mitt awl's ksha es gyoost vatt in iahra deensht.”

²⁷Fa em Dawfit sei letshti gebodda ausdrawwa, voahra di Lefiddah gezayld funn zvansich yoah ald un nuff.

²⁸Di eahvet funn di Lefiddah voah fa em Aaron sei nohch-kummashaft helfa im deensht fumm HAH sei haus. Si henn acht gevva uf di foah-hayf, di seit shtubba, henn's heilich sach rein kalda un henn awl di annah eahvet gedu es zu du katt hott mitt em deensht funn Gott sei haus.

²⁹Si henn acht gevva uf's broht es uf em dish voah, uf's mayl fa di shpeis-opfah un uf di unksavvahda kucha es gebakka voahra in panna. Si henn missa alles raus messa in gvicht un's mixa mitt ayl un's no bakka.

³⁰Si henn alli meiya missa shtay un da HAH lohva un danka. No henn si dess viddah gedu ohvets,

³¹un aw vann brand-opfahra gmacht voahra zumm HAH uf em Sabbat-Dawk, an di Neiya-Moon Fesht-Zeida un an anri grohsi essa es ausgevva voahra zu eena. So feel Lefiddah es es foah-shreives kfoddaht hott, henn gedeend fannich em HAH di gans zeit.

³²So di Lefiddah iahra deensht voah fa ivvah da tempel-tent sei, un aw ivvah da Heilich-Blatz, diveil es si gedeend henn im HAH sei haus mitt iahra breedah, di nohch-kummashaft fumm Aaron.