Read Pennsylvania German 1. Chronik 26 Bible Online

1. Chronik 26 - Pennsylvania German bible

1. Chronik 26

¹Di doah-heedah voahra fadayld vi dess: funn di Korahiddah voah's da Meselemia, em Kore sei boo, fumm Asaph sei family.

²Da Meselemia hott dee boova katt: da Sacharia, da eldsht; da Jediael, da zvett; da Sebadia, da dritt; da Jathniel, da fiaht;

³da Elam, da fimft; da Johanan, da sext; un da Elioenai, da sivvet.

⁴Da Obed-Edom hott dee boova katt: da Semaia, da elsht; da Josabad, da zvett; da Joah, da dritt; da Sachar, da fiaht; da Nathanael, da fimft;

⁵da Ammiel, da sext; da Isachar, da sivvet; un da Pegulthai, da acht, fa Gott hott een ksaykend.

⁶Sei boo da Semaia hott aw boova katt es evvahshti voahra im Semaia sei shtamm veil si mechtichi un kshikti mennah voahra.

⁷Em Semaia sei boova voahra da Othni, da Rephael, da Obed un da Elsabad. In iahra freindshaft voahra da Elihu un da Samachia, un si voahra aw mechtichi un goot-kshikti mennah.

⁸Awl dee voahra fumm Obed-Edom sei nohch-kummashaft. Iahra kinnah un freindshaft voahra kshikti mennah mitt di graft fa di eahvet du. Es voahra zvay un sechtzich fumm Obed-Edom sei nohch-kummashaft.

⁹Em Meselemia sei achtzay boova un freindshaft voahra aw hohch ohksenna un goot-kshikti mennah.

¹⁰Da Hosa, ayns fumm Merari sei boova, hott dee do boova katt: da Simri, sei daett hott een da evvahsht gmacht, avvah eah voah nett da elsht;

¹¹da Hilkia, da zvett; da Tebalia, da dritt; un da Sacharia, da fiaht. Alles zammah voahra's dreitzay fumm Hosa sei boova un freindshaft.

¹²Dee doah-heedah voahra fadayld noch di evvahshti family mennah, un iahra eahvet fa deena im tempel fumm HAH voah grawt vi selli funn iahra freindshaft.

¹³Es lohs voah gezowwa bei yaydah family, eb di family grohs adda glay voah, un dess voah fa alli doah.

¹⁴Es lohs fa's East Doah is zumm Meselemia kfalla. No henn si's lohs gezowwa fa sei boo da Sacharia, en shmeahdah roht-gevvah, un's Natt Doah is zu eem kfalla.

¹⁵Es lohs fa's Saut Doah is zumm Obed-Edom kfalla, un's lohs fa's shtoah-haus is zu sei boova kfalla.

¹⁶Es West Doah bei em Salecheth Doah es naus uf di shtrohs gayt, is zumm Suppim un em Hosa kfalla. Di doah-heedah iahra zeit voah awl gleicha fadayld.

¹⁷Alli dawk voahra sex Lefiddah uf di east, fiah uf di natt, fiah uf di saut un zvay an yaydahs funn di shtoah-heisah.

¹⁸Am court-foah-hohf uf di west seit voahra fiah doah-heedah am vayk un zvay am gebei.

¹⁹Sell voah vi di doah-heedah fadayld voahra. Si voahra aus di nohch-kummashaft fumm Korah un em Merari gnumma.

²⁰Di Lefiddah freindshaft, mitt em foah-gengah Ahia, voahra ivvah di geld-shtubba ksetzt im haus funn Gott. Si voahra aw ivvah di kshenkah es heilich gmacht voahra.

²¹Em Laedan sei nohch-kummashaft es Gersoniddah voahra deich da Laedan, un es evvahshti voahra fumm Laedan sei shtamm, voahra di Jehieliddah.

²²Di kinnah funn di Jehieliddah voahra da Getham un sei broodah da Joel. Si voahra ivvah di geld-shtubba ksetzt im tempel fumm HAH.

²³Funn di Amramiddah, di Jizhariddah, di Hebroniddah un di Usieliddah,

²⁴voah da Subuel da evvahsht ivvah di geld-shtubba. Eah voah em Gersom sei boo es em Mosi sei boo voah.

²⁵In sei freindshaft deich da Elieser voah's sei boo da Rehabia, sei boo voah da Jesaia, sei boo voah da Joram, sei boo voah da Sichri un sei boo voah da Selomith.

²⁶Da Selomith un sei freindshaft voahra ivvah awl di kshenkda sacha es heilich gmacht voahra beim Kaynich Dawfit un bei di evvahshti funn di families es hauptmennah voahra ivvah dausends, ivvah hunnahts, un aw bei anri hauptmennah.

²⁷Dayl fumm sach es gnumma voah im greek voah heilich gmacht un voah gyoost fa da tempel fumm HAH ufhalda.

²⁸Awl's sach es heilich gmacht voah beim brofayt Samuel, beim Kis sei boo, da Saul, beim Ner sei boo, da Abner, bei di Zeruia iahra boo, da Joab un's ivvahrich heilich sach voah alles acht gevva druff beim Selomith un sei freindshaft.

²⁹Funn di kshlecht fumm Jizhar, is da Chenania kumma. Eah un sei boova voahra eahvet gevva vekk fumm tempel. Si voahra evvahshti un richtah ivvah Israel.

³⁰Funn di kshlecht fumm Hebron, is da Hasabia kumma. Eah un sei freindshaft—fuftzay hunnaht goodi mennah—voahra eahvet gevva in Israel west fumm Jordan Revvah. Si henn kshaft fa da HAH un fa da kaynich.

³¹Da Jeria voah aw fumm Hebron sei kshlecht un voah da evvahsht im kshlecht so vi's veist im freindshaft shreives. Im fatzichsht yoah fumm Dawfit sei kaynich-reich henn si's ufgegukt im shreives un henn goodi mennah kfunna unnich di Hebroniddah es an Jaser in Gilead gvoond henn.

³²Es voahra sivvana zvansich hunnaht goodi mennah unnich em Jeria sei freindshaft es evvahshti voahra funn iahra families. Da Kaynich Dawfit hott si no ivvah-saynah gmacht ivvah di Rubeniddah, di Gadiddah un's halb-shtamm fumm Manasse mitt alles es zu du katt hott funn Gott un di eahvet fumm kaynich.