Read Pennsylvania German 2. Chronik 14 Bible Online

2. Chronik 14 - Pennsylvania German bible

2. Chronik 14

¹Da Abia hott no kshlohfa mitt sei foah-feddah un voah fagrawva in di shtatt fumm Dawfit. Sei boo da Asa is no kaynich vadda in seim blatz, un's voah fridda im land fa zeyya yoah in sei zeit.

²Da Asa hott gedu vass recht voah in di awwa fumm HAH, sei Gott.

³Eah hott di fremda awldahra un di hohcha-bletz vekk gedu, un hott di shtay abgettah-gleichnisa runnah grissa un di Ashera-poshta umkakt.

⁴Eah hott Juda gmacht da HAH, da Gott funn iahra foah-feddah sucha, un aw sei ksetz un gebodda halda.

⁵Eah hott di hohcha-bletz un insens-awldah vekk gedu in alli shtatt in Juda, un's kaynich-reich voah in fridda unnich eem.

⁶Eah hott di fashteikta shtett in Juda ufgebaut diveil sei land in fridda voah. Nimmand hott greek gmacht mitt eem deich selli yoahra, veil da HAH eem roo gevva hott.

⁷Eah hott ksawt zu Juda, “Vella dee shtett ufbauwa un mavvahra drumm rumm du mitt tavvahs, doahra un shlees-rikkel. Dess is alsnoch unsah land, veil miah da HAH unsah Gott ksucht henn, un eah hott uns roo gevva uf alli seit.” So henn si gebaut un's is eena goot ganga.

⁸Da Asa hott en army katt es drei hunnaht dausend mennah katt hott funn Juda mitt grohsi shields un mitt shpiahs, un zvay hunnaht un achtzich dausend fumm Benjamin es glenni shields katt henn mitt bows. Dee voahra awl shteiki greeks-leit.

⁹Da Serah, da Kushiddah, is no geyyich si kumma mitt en grohsi army un drei hunnaht greeks-veyya. Si sinn kumma biss an di shtatt Maresa.

¹⁰Da Asa is no naus ganga fa si ohdreffa. Si henn sich grisht fa fechta in di Valley funn Zephatha nayksht an Maresa.

¹¹No hott da Asa zumm HAH, sei Gott, gebayda un hott ksawt, “HAH, es hott nimmand vi dich fa selli helfa es unni graft sinn geyyich selli es mechtich sinn. Helf uns, oh HAH, unsah Gott, fa miah falossa uns uf dich. In deim nohma sinn miah geyyich dee grohs army kumma. Oh HAH, du bisht unsah Gott; loss kenn mensh dich ivvah-kumma.”

¹²So hott da HAH di Kushiddah nunnah kshlauwa fannich em Asa un Juda. Di Kushiddah sinn kshprunga fa vekk,

¹³un da Asa un sei greeks-leit sinn eena nohch ganga biss an Gerar. So feel funn di Kushiddah sinn kfalla es si sich nimmi zammah greeya henn kenna, fa si voahra kshlauwa beim HAH un bei sei greeks-leit. Un di mennah funn Juda henn feel sach vekk gedrawwa.

¹⁴Si henn awl di glenna shtetlen um Gerar rumm nunnah grissa, fa di angsht fumm HAH is ivvah di leit kumma. Si henn sach aus awl di shtetlen gnumma veil feel datt voah.

¹⁵Si henn aw di fee-heedah kfochta un henn feel shohf un kamayla vekk gnumma. No sinn si viddah zrikk an Jerusalem ganga.