Read Pennsylvania German 2. Chronik 17 Bible Online

2. Chronik 17 - Pennsylvania German bible

2. Chronik 17

¹Da Josaphat, em Asa sei boo, is no kaynich vadda un eah hott sich shteik gmacht geyyich Israel.

²Eah hott greeks-gnechta in awl di fashteikta shtett funn Juda gedu, un hott noch may in drubba gedu draus aus di shtett in Juda, un aw in di shtett funn Ephraim es sei daett da Asa gnumma katt hott im greek.

³Da HAH voah mitt em Josaphat veil eah gloffa is in di vayya es sei faddah da Dawfit gloffa is in sei eahshti yoahra. Eah hott nett di Baals ksucht,

⁴avvah eah hott da Gott funn sei faddah ksucht, un hott sei gebodda kalda un nett gedu vi Israel.

⁵Unnich eem hott da HAH sei kaynich-reich shteik gmacht, un gans Juda hott kshenkah zumm Josaphat gevva, so es eah reich voah un hott hohchi eah katt.

⁶Sei hatz voah ksetzt fa em HAH nohch gay, un eah hott di hohcha-bletz un di Ashera-poshta vekk gedu aus Juda.

⁷Im dridda yoah funn sei kaynich-reich hott eah sei evvahshti, da Ben-Hail, da Obadia, da Sacharia, da Nathanael un da Michaia kshikt fa leit lanna in di shtett funn Juda.

⁸Mitt eena voahra dayl Lefiddah—da Semaia, da Nethania, da Sebadia, da Asael, da Semiramoth, da Jonathan, da Adonia, da Tobia un da Tob-Adonia—un aw di preeshtah, da Elisama un da Joram.

⁹Si henn di leit gland gans deich Juda, un henn's Ksetz-Buch fumm HAH mitt sich gnumma. Si sinn rumm ganga zu awl di shtett in Juda un henn di leit gland.

¹⁰Di furcht fumm HAH is uf awl di kaynich-reicha funn di lendah um Juda rumm kfalla, so henn si nett greek gmacht mitt em Josaphat.

¹¹Dayl funn di Philishtah henn kshenkah un tax-silvah zumm Josaphat gebrocht, un di Arabah leit henn eem sivva dausend un sivva hunnaht shohf-bekk, un sivva dausend un sivva hunnaht gays-bekk gebrocht.

¹²Da Josaphat is shteikah un shteikah vadda, un eah hott fecht-shtett un shtoah-haus-shtett gebaut in Juda.

¹³Eah hott feel sach ufkshtoaht kalda in di shtett funn Juda, un hott mennah es goot fechta henn kenna in Jerusalem kalda.

¹⁴Dee greeks-gnechta voahra gnambaht bei iahra kshlechtah vi dess: funn Juda, di hauptmennah ivvah en drubb funn en dausend, un ivvah si awl voah da Adna es hauptmann voah ivvah drei hunnaht dausend alles zammah;

¹⁵neksht voah da Johanan, da hauptmann funn zvay hunnaht un achtzich dausend;

¹⁶neksht voah da Amasia, em Sichri sei boo, es sich frei-villich gevva hott fa da deensht fumm HAH, mitt zvay hunnaht dausend.

¹⁷Funn Benjamin, da Eliada, en mechtichah greeks-gnecht, mitt zvay hunnaht dausend mennah es bows un shields katt henn;

¹⁸neksht voah da Josabad mitt en hunnaht un achtzich dausend mennah grisht fa fechta.

¹⁹Dess voahra di mennah es im kaynich sei deensht voahra, unni noch selli es in di fashteikti shtett voahra in Juda.