Read Pennsylvania German 2. Chronik 2 Bible Online

2. Chronik 2 - Pennsylvania German bible

2. Chronik 2

¹Da Solomon hott nau ausgmacht fa en tempel bauwa fa em HAH sei Nohma eahra, un en kaynich-haus fa sich selvaht.

²Eah hott sivvatzich dausend mennah an di eahvet gedu fa's sach drawwa un achtzich dausend fa shtay hakka. No hott eah drei un sechtzich hunnaht mennah ivvah si gedu fa foah gay.

³Da Solomon hott no deah breef kshikt zumm Huram, da kaynich funn Tyrus: “Shikk miah cedar blekk vi du hosht fa mei daett, da Dawfit, vo eah sich en kaynich-haus gebaut hott fa drinn voona.

⁴Ich binn am rishta fa en tempel bauwa fa da Nohma fumm HAH mei Gott eahra. Es soll en blatz sei es raus ksetzt is fa goot-shmakkich insens brenna fannich eem, fa's shau-broht alli dawk fannich een setza, un fa di brand-opfah opfahra meiyets un ohvets un uf di Sabbat-Dawwa, an di Neiya-Moons un an di Tempel-Feshta fumm HAH unsah Gott. Dee sacha sinn kfoddaht funn Israel fa'immah.

⁵Dess haus es ich bauwa vill soll grohs sei, veil unsah Gott graysah is es awl di gettah.

⁶Avvah veah kann eem en haus bauwa, fa di haychshta himla kenna een nett hayva? So veah binn ich es ich eem en haus bauwa sett, unni yusht fa opfahra brenna fannich eem?

⁷So shikk miah en mann es goot is in di eahvet funn gold, silvah, bronze un eisa shaffa, aynah es duch purpel, roht un bloh feahva kann un es vayst vi feini eahvet du am hols shnitzla un shtay hakka. Eah soll shaffa mitt mei kshikti shreinah do in Juda un Jerusalem, dee es mei daett da Dawfit pshteld katt hott.

⁸Shikk miah aw cedar, pine un sandel-hols blekk funn Lebanon veil ich vays es dei mennah goot sinn am baym um macha. Ich shikk mei mennah fa shaffa mitt deini.

⁹Ich brauch feel hols, veil da tempel es ich bauwa zayl grohs un shay sei muss.

¹⁰Ich gebb dei gnechta, di hols-hakkah, zvansich dausend bushel vaytza, zvansich dausend bushel geahsht, zvansich dausend galla vei un zvansich dausend galla ayl.”

¹¹Da Huram, da kaynich funn Tyrus, hott no deah breef zrikk kshikt zumm Solomon: “Veil da HAH sei leit leeb hott, dann hott eah dich kaynich gmacht ivvah si.”

¹²Un eah hott veidah kshrivva: “Glohbt is da HAH, da Gott funn Israel, deah es da himmel un di eaht gmacht hott! Eah hott em Kaynich Dawfit en boo gevva mitt veisheit, aynah es goot kshikt is un goodah fashtand hott, deah es en haus bauwa zayld fa da HAH un fa sich selvaht.

¹³Ich zayl diah en mann shikka es vundahboah goot kshikt is un goodah fashtand hott. Sei nohma is Huram,

¹⁴sei maemm is funn di Daniddah un sei daett voah funn Tyrus. Eah is goot gland in di eahvet funn gold, silvah, bronze un eisa shaffa, un aw mitt shtay un hols. Eah vayst vi duch zu feahva mitt purpel, bloh un roht, un kann aw shaffa mitt fei linnen duch. Eah kann alli sadda fei shnitzles un maysles du in hols es eem gevva is zu du. Eah shaft mitt dei gegawbdi mennah un selli es mei meishtah un dei daett, da Dawfit, gedunga katt hott.

¹⁵Nau loss mei hah da vaytza, geahsht, ayl un vei zu sei gnechta shikka vi eah ksawt hott,

¹⁶no hakka miah awl di blekk funn Lebanon es du brauchsht. Miah binna si zammah un shvimma si nunnah an Joppa uf em say. Funn datt kansht du si nuff an Jerusalem nemma.”

¹⁷Da Solomon hott no awl di ausahra leit gezayld es in Israel voahra, so vi sei daett da Dawfit si gezayld katt hott, un's voahra 153,600 funn eena.

¹⁸Eah hott 70,000 funn eena di eahvet gevva fa sacha drawwa, un 80,000 fa shtay hakka drovva in di hivla. No hott eah 3,600 mennah ivvah si gedu fa foah gay un si an di eahvet halda.