Read Pennsylvania German 2. Mosi 21 Bible Online

2. Mosi 21 - Pennsylvania German bible

2. Mosi 21

¹“Nau dess sinn di adnunga es du fannich si setza solsht:

²Vann du en Hebrayishah gnecht kawfsht, soll eah sex yoah deena. Im sivvada yoah soll eah frei gmacht sei fa nix.

³Vann eah laynich kumma is, soll eah laynich naus gay. Vann eah kumma is mitt'n fraw, soll sei fraw mitt eem naus gay.

⁴Vann sei meishtah eem en fraw gevva hott, un's sinn boova un mayt geboahra zu eem bei iahra, dann soll di fraw un iahra kinnah zumm meishtah heahra. Eah soll no laynich naus gay.

⁵Avvah vann da gnecht grawt raus sawkt, ‘Ich habb mei meishtah, mei fraw un mei kinnah leeb, ich vill nett naus gay es en freiyah mann,’

⁶no soll sei meishtah een zu di richtah bringa. Eah soll een an di deah adda da deah-poshta bringa un en loch in sei oah macha mitt'na awl. No soll eah sei meishtah deena sei layva lang.

⁷Vann en mann sei dochtah fakawft fa en mawt, soll see nett frei gay vi di gnechta doon.

⁸Vann see iahra meishtah nett kfald, deah es see gnumma hott fa sich selvaht, dann muss eah see lossa zrikk gekawft sei. Eah dauf see nett fakawfa zu Heida-Leit, veil eah nett feah voah zu iahra.

⁹Vann eah see zu seim boo gevva vill, dann muss eah iahra's recht gevva funn en dochtah.

¹⁰Vann eah en anri fraw zu sich nemd, dauf eah di eahsht fraw nett vennichah ess-sach un glaydah gevva adda sich halda funn iahra.

¹¹Vann eah iahra nett dee drei sacha gebt, dann is see frei fa gay, unni es geld betzawld vatt.

¹²Ennich ebbah es en mann shlakt es eah shtaubt, soll selvaht aw doht gmacht sei.

¹³Avvah vann eah's nett poahbes dutt, un Gott hott's glost blatz nemma, dann kann eah an en blatz shpringa es ich diah sawk.

¹⁴Vann avvah en mann sei nochbah frei-villich un poahbes doht macht, sellah mann solsht du vekk nemma funn meim awldah so es eah doht gmacht vatt.

¹⁵Ennich ebbah es sei daett adda maemm shlakt soll doht gmacht vadda.

¹⁶Un vann ebbah en anra mann shtayld, un eah fakawft een, adda da mann is noch bei em deeb vann eah kfanga vatt, dann soll eah doht gmacht sei.

¹⁷Ennich ebbah es sei daett adda maemm faflucht soll doht gmacht sei.

¹⁸Vann mennah fechta mitt-nannah, un aynah shlakt da annah mitt en shtay adda di fausht, un sellah mann shtaubt nett avvah is im bett,

¹⁹vann eah no uf shtay kann un rumm lawfa mitt sei shtokk, dann soll da vann es een kshlauwa hott nett kshtrohft sei. Avvah eah muss deah vo vay gedu is betzawla fa di zeit es eah faloahra hott un muss sayna es eah kayld vatt.

²⁰Vann en mann en gnecht adda en mawt es eah aykend shlakt mitt en shtekka un si shtauva, dann muss sellah mann kshtrohft sei.

²¹Avvah vann si ay adda zvay dawk shpaydah uf shtayn, dann brauch eah nett kshtrohft sei veil eah si aykend.

²²Vann mennah am fechta sinn un si doon en fraw vay es uf em family vayk is, so es iahra kind geboahra vatt eb zeit, un nix veidah's kumd difunn, soll sellah es es gedu hott betzawla vass di fraw iahra mann sawkt, un vass di richtah sawwa.

²³Avvah vann veidah shawda kumd difunn, no musht du en layva fa en layva nemma,

²⁴en awk fa en awk, en zoh fa en zoh, en hand fa en hand, en foos fa en foos,

²⁵en brenn fa en brenn, en shnitt fa en shnitt un en vay fa en vay.

²⁶Vann en mann's awk shlakt funn seim gnecht adda mawt es eah aykend, un macht's awk blind, dann muss eah si frei gay lossa, veil eah si gmacht hott en awk faliahra.

²⁷Vann eah en zoh raus shlakt funn sei gnecht adda mawt es eah aykend, dann muss eah si frei gay lossa, veil eah si gmacht hott en zoh faliahra.

²⁸Vann en ox en mann adda en fraw doht macht mitt di hanna dann muss da ox doht kshtaynicht sei, un sei flaysh soll nett gessa sei. Avvah da ayknah fumm ox soll frei gay.

²⁹Vann avvah da ox da nohma hott fa leit hanna, un da ayknah voah eahshtah gvand diveyya, un eah hott da ox nett eikshpatt—vann sellah ox en mann adda en fraw doht macht, dann soll da ox kshtaynicht sei un da ayknah soll aw doht gmacht sei.

³⁰Vann avvah geld kfrohkt vatt fumm ayknah, dann soll eah geld betzawla in blatz funn sei layva gevva. Eah soll betzawla vass-evvah es kfrohkt vatt funn eem.

³¹Vann da ox en boo adda en maydel hanna dutt, dann soll's saym ding gedu vadda.

³²Vann da ox ebbah sei gnecht adda mawt hanna dutt es eah aykend, dann soll da ayknah fumm ox da ayknah fumm gnecht adda di mawt dreisich shtikkah silvah gevvah un da ox soll doht kshtaynicht sei.

³³Vann en mann en loch abdekt, adda ayns grawbt un dekt's nett zu, un en ox adda en aysel fald nei,

³⁴dann muss da ayknah fumm loch betzawla fa's diah. Eah soll da ayknah fumm diah betzawla, un's doht diah is no sei.

³⁵Vann ebbah sei ox ebbah shunsht sei ox vay dutt so es ah doht gayt, dann sella si da levendich ox fakawfa un's geld fadayla. Si sella aw da doht ox fadayla.

³⁶Vann's avvah gvist voah es da ox difoah anri vay gedu katt hott un da ayknah hott een nett eikshpatt, no soll eah en ox fa en ox betzawla, un da doht ox soll zu eem heahra.”