Read Pennsylvania German 2. Mosi 25 Bible Online

2. Mosi 25 - Pennsylvania German bible

2. Mosi 25

¹No hott da HAH kshvetzt zumm Mosi un hott ksawt,

²“Sawk di Kinnah-Israel es si sella miah kshenkah bringa fa en opfah. Du solsht dee kshenkah nemma fa mich funn alli-ebbah es psunna is im hatz fa frei-villich gevva.

³Dess sinn di kshenkah es du nemma solsht funn eena: gold, silvah, bronze,

⁴blohwi, purpeli un rohdi vull, keshtlich linnen duch, gaysa-hoah,

⁵shohf-bokk-haut es roht gmacht is, leddah funn badger-haut, acacia-hols,

⁶ayl fa lichtah, shpeis fa salb-ayl un fa goot-shmakkich insens,

⁷onyx-shtay un anri keshtlichi shtay fa im hohchen-preeshtah sei preeshtah-shatz un brusht-shtikk setza.

⁸Un si sella miah en tempel-tent bauwa so es ich datt unnich eena voona kann.

⁹Si sella dess gebei un alles es drinn is macha grawt vi ich diah en mushtah gebb difoah.

¹⁰Un si sella en lawt macha aus acacia hols es drei un drei-faddel foos lang is, zvay un a halb foos brayt is, un zvay un a halb foos hohch is.

¹¹Du solsht di lawt inseit un autseit ivvah-zeeya mitt pyuah gold, un mach's trimm um si rumm funn gold.

¹²Shmels gold un mach fiah goldichi rings fa di lawt. Mach di rings fesht an di fiah fees funn di lawt, zvay uf ay seit un zvay uf di annah seit.

¹³Du solsht no pohls macha aus acacia hols un si ivvah-zeeya mitt gold.

¹⁴Shtekk di pohls deich di rings uf di seit funn di lawt fa si drawwa.

¹⁵Di pohls sella in di rings funn di lawt bleiva, si sella nett raus gezowwa sei.

¹⁶Du solsht's Zeiknis es ich diah gevva zayl in di lawt layya.

¹⁷Mach en dekkel es gnawda-shtool hayst aus pyuah gold. Da gnawda-shtool soll drei un drei-faddel foos lang sei un zvay un a faddel foos brayt sei.

¹⁸Du solsht zvay cherubim raus hammahra funn gold un si an yaydah end fumm gnawda-shtool du.

¹⁹Mach ay cherub fa ay end un noch aynah fa's annah end. Mach si fesht am yaydah end fumm gnawda-shtool so es es alles ay shtikk is.

²⁰Di cherubim sella nannah ohgukka un iahra flikkel nuff un ausnannah havva ivvah da gnawda-shtool. Di ksichtah funn di cherubim sella geyyich da gnawda-shtool gukka.

²¹Du solsht da gnawda-shtool ovva uf di lawt du un's Zeiknis es ich diah gevva zayl inseit du.

²²Datt, ovvich em gnawda-shtool zvishich di zvay cherubim ivvah di Bundes-Lawt kumm ich zu diah, un shvetz zu diah, un gebb diah awl mei gebodda fa di Kinnah-Israel.

²³Du solsht en dish aus acacia hols macha es drei foos lang is, ay un a halb foos brayt is, un zvay un a faddel foos hohch is.

²⁴Du solsht da dish ivvah-zeeya mitt pyuah gold, un en rimm drumm rumm du es gmacht is funn gold.

²⁵Mach en fraym drumm rumm es di brayding funna hand is, un du goldichi molding druff.

²⁶Du solsht fiah goldichi rings macha fa da dish un si an di fiah ekkah du vo di bay sinn.

²⁷Di rings sella nayksht an da rimm sei fa di pohls hayva es gyoost sinn fa da dish drawwa.

²⁸Du solsht di pohls macha aus acacia hols un si ivvah-zeeya mitt gold, so es da dish gedrawwa sei kann mitt'na.

²⁹Du solsht shisla un lefla macha un aw bowls un pitshahs fa di opfahra raus leahra. Dess ksha solsht du macha aus pyuah gold.

³⁰Uf em dish solsht du immah Shau-Broht halda fannich miah.

³¹Du solsht en lichtah-shtaend macha aus pyuah gold. Da foos un di shtamma sella aus kemmaht gold gmacht sei un di koblen, di gnebb un di blumma sella awl ay shtikk sei mitt em ivvahricha.

³²Sex eahm sella naus gay fumm lichtah-shtaend, drei eahm funn ay seit un drei eahm funn di annah seit.

³³Yaydah oahm soll drei koblen havva es kshaybt sinn vi almond blumma mitt gnebb un bleddah. Sellah vayk sella awl sex funn di eahm gmacht sei es aus em lichtah-shtaend gayn.

³⁴Avvah da shtamm fumm lichtah-shtaend soll fiah koblen havva es kshaybt sinn vi almond blumma mitt gnebb un bleddah.

³⁵En gnobb soll unnich ay poah eahm sei, en gnobb unnich di zvett poah un en gnobb unnich di dritt poah—sex eahm alles zammah es aus em lichtah-shtaend kumma.

³⁶Di gnebb un di eahm sella awl ay shtikk sei mitt em lichtah-shtaend es aus pyuah gold kemmaht is.

³⁷No mach sivva lichtah un hokk si ovva druff so es si licht macha im blatz fanna droh.

³⁸'S ksha fa's flamm ausgay macha un di dellahra sella gmacht sei funn pyuah gold.

³⁹En shtikk pyuah gold es fimf un sivvatzich pund veekt soll gyoost sei fa da lichtah-shtaend un's ksha macha.

⁴⁰Sayn ditzu es du alles machsht noch em mushtah es diah gvissa voah uf em berg.”