Read Pennsylvania German 2. Mosi 3 Bible Online

2. Mosi 3 - Pennsylvania German bible

2. Mosi 3

¹Nau da Mosi voah am di shohf heeda fumm Jethro, sei shviah-faddah. Da Jethro voah da preeshtah in Midian. Da Mosi hott di shohf vay zrikk in di vildahnis gedrivva, un is endlich an Horeb, da berg funn Gott kumma.

²Datt hott da engel funn Gott sich gvissa zu eem in en flamm funn feiyah imma hekka-putsha. Da Mosi hott gegukt, un da hekka-putsha voah am brenna mitt feiyah, avvah eah is nett ufgebrend.

³No hott da Mosi ksawt, “Ich gay moll nivvah un sayn dess vundahboah ding, favass deah hekka-putsha nett ufbrenna dutt.”

⁴Vo da HAH ksenna hott es eah nivvah ganga is, hott Gott zu eem groofa aus em hekka-putsha, un hott ksawt, “Mosi, Mosi.” Un eah hott ksawt, “Do binn ich.”

⁵“Kumm nett naykshtah,” hott Gott ksawt. “Du dei shoo aus, fa da blatz vo du am shtay bisht is heilichah grund.”

⁶No hott Gott ksawt, “Ich binn da Gott funn dei faddah, da Gott fumm Abraham, da Gott fumm Isaac un da Gott fumm Jakob.” Da Mosi hott sich kfeicht an Gott gukka, un hott sei ksicht zu gedekt.

⁷No hott da HAH ksawt, “Ich habb veiklich dess aylend ksenna mitt mei leit in Egypta. Ich habb si keaht am naus roofa veyyich di shreklicha leit es ivvah si sinn, un ich sayn iahra leides.

⁸So binn ich runnah kumma fa si frei macha funn di Egyptah, un fa si ruff aus sellem land bringa in en goot un grohs land. In demm land lawft millich un hunnich vi vassah, un is da blatz vo di Kanaaniddah, di Hethiddah, di Amoriddah, di Pheresiddah, di Heffiddah un di Jebusiddah voona.

⁹Un nau is dess geroof fa hilf funn di Israeliddah zu miah kumma, un ich habb ksenna vi shreklich es di Egyptah si leida macha.

¹⁰So nau, kumm, ich vill dich zumm Pharao shikka so es du mei leit, di Kinnah-Israel, aus Egypta bringsht.”

¹¹Avvah da Mosi hott ksawt zu Gott, “Veah binn ich, es ich zumm Pharao gay sett un di Kinnah-Israel aus Egypta bringa?”

¹²Gott hott no ksawt, “Ich zayl bei diah sei, un dess zayld da zaycha sei zu diah es ich dich kshikt habb: Vann du moll di leit aus Egypta gebrocht hosht, zayla diah Gott deena an demm berg.”

¹³Da Mosi hott no ksawt zu Gott, “Vann ich zu di Kinnah-Israel gay un sawk zu eena, ‘Da Gott funn eiyah foah-feddah hott mich zu eich kshikt,’ un si frohwa mich, ‘Vass is sei nohma?’ vass soll ich eena no sawwa?”

¹⁴No hott Gott ksawt zumm Mosi, “Ich Binn Veah Ich Binn. Du solsht di Kinnah-Israel sawwa, ‘Da Ich Binn hott mich zu eich kshikt.’”

¹⁵Un Gott hott veidah ksawt zumm Mosi, “Dess solsht du sawwa zu di Kinnah-Israel, ‘Da HAH, da Gott funn eiyah foah-feddah—da Gott fumm Abraham, da Gott fumm Isaac un da Gott fumm Jakob—hott mich zu eich kshikt.’ Sell is mei nohma fa'immah, da nohma es ich gay dibei funn nohch-kummashaft zu nohch-kummashaft.

¹⁶Gay un geddah di eldishti funn Israel zammah un sawk zu eena, ‘Da HAH, da Gott funn eiyah foah-feddah—da Gott fumm Abraham, fumm Isaac un fumm Jakob—hott sich gvissa zu miah un hott ksawt, “Ich habb eich gepsucht, un habb ksenna vass gedu voah zu eich in Egypta.

¹⁷Un ich habb ksawt ich zayl eich aus demm aylend in Egypta nemma, un zayl eich in's land funn di Kanaaniddah, di Hethiddah, di Amoriddah, di Pheresiddah, di Heffiddah un di Jebusiddah bringa—en land vo millich un hunnich lawft vi vassah.”’

¹⁸Di eldishti funn Israel zayla dich abheicha. No solsht du un di eldishti zumm kaynich in Egypta gay un sawwa zu eem, ‘Da HAH, da Gott funn di Hebrayah hott uns groofa. So nau loss uns uf da vayk gay fa drei dawk in di vildahnis so es miah datt opfahra kenna zu em HAH, unsah Gott.’

¹⁹Avvah ich vays es da kaynich funn Egypta eich nett gay lost unni deich en shteiki hand.

²⁰So shtrekk ich mei hand naus un shlakk di Egyptah mitt vundahboahri sacha es ich du zayl unnich eena. Noch sellem, lost eah eich gay.

²¹Un ich gebb dee leit gnawt in di awwa funn di Egyptah, so es vann diah moll gaynd, zaylet diah nett leah raus gay.

²²Alli veibsmensh soll iahra nochbah un ennichi fraw es in iahra haus voond frohwa fa sacha gmacht aus silvah un gold, un aw fa glaydah es diah eiyah boova un mayt ohdu kennet. Sellah vayk greeyet diah di Egyptah iahra shtoft fa mitt eich nemma.”