Read Pennsylvania German 2. Mosi 31 Bible Online

2. Mosi 31 - Pennsylvania German bible

2. Mosi 31

¹Da HAH hott no ksawt zumm Mosi,

²“Nau gukk moll, ich habb da Bezaleel raus groofa bei seim nohma. Eah is funn di shtamm fumm Juda un is em Uri sei boo. Da Uri is em Hur sei boo.

³Ich habb een kfild mitt em Geisht Gottes, un mitt veisheit, fashtand un eisicht fa alli sadda sacha macha.

⁴Eah kann mushtahra zammah du fa shtikkah aus gold, silvah un bronze macha.

⁵Eah kann keshtlichi shtay shneida un si eisetza in gold un silvah. Un eah kann shayni sacha in hols shnitzla. Eah is goot am alli sadda sacha macha.

⁶Ich habb aw da Oholiab, em Ahisamach sei boo es funn di shtamm fumm Dan is, groofa fa em Bezaleel helfa. Un ich habb aw in di hatza funn awl di glandi shaff-leit di gawb gevva fa alles macha es ich diah gebodda habb.

⁷Si sella awl dee sacha macha: da fasamling-tent, di Bundes-Lawt, da gnawda-shtool, un awl's annah ksha im tent;

⁸da dish un sei ksha, da goldich lichtah-shtaend un sei ksha, un da insens-awldah:

⁹da brand-opfah-awldah un sei ksha, di vesh-shissel un iahra shtaend;

¹⁰di deensht-glaydah, sell is, di heilicha glaydah fa da preeshtah Aaron, un di glaydah fa sei boova vann si da preeshtah-deensht ausfiahra;

¹¹es salb-ayl, un's goot-shmakkich insens fa da Heilich-Blatz. Si sella alles macha grawt vi ich diah gebodda habb.”

¹²Da HAH hott no ksawt zumm Mosi,

¹³“Shvetz zu di Kinnah-Israel un sawk eena, ‘Diah misset mei Sabbat-Dawk halda. Dess is en zaycha zvishich miah un eich un eiyah nohch-kummashaft, so es diah visset es ich eiyah HAH binn, deah vo eich heilich macht.

¹⁴Fasell haldet da Sabbat-Dawk veil ah heilich is zu eich. Ennich ebbah es da Sabbat-Dawk unrein macht muss doht gmacht sei. Ennich ebbah es shaft uf em Sabbat-Dawk muss abkshnidda sei funn sei leit.

¹⁵Sex dawk sella diah shaffa, avvah uf em sivvada dawk sella diah roowa. Deah dawk is heilich zumm HAH. Ennich ebbah es shaft uf em Sabbat-Dawk muss doht gmacht sei.

¹⁶Di Kinnah-Israel sella da Sabbat-Dawk halda. Dess is en ayvichah bund zvishich eena un miah es on gay soll fa'immah.

¹⁷Es is en zaycha zvishich miah un di Kinnah-Israel fa'immah. Fa in sex dawk hott da HAH da himmel un di eaht kshaffa, avvah uf em sivvada dawk hott eah kshtobt shaffa un hott groot.’”

¹⁸Vo da HAH faddich voah shvetza zumm Mosi uf em Berg Sinai, hott eah eem di zvay zeiknis-shtay gevva es kshrivva voahra mitt em fingah funn Gott.