Read Pennsylvania German 2. Mosi 35 Bible Online

2. Mosi 35 - Pennsylvania German bible

2. Mosi 35

¹No hott da Mosi awl di leit funn di Kinnah-Israel zammah ksammeld un hott ksawt zu eena, “Dee sacha sinn vass da HAH gebodda hott es diah du sellet:

²Sex dawk soll eahvet gedu sei, avvah da sivvet dawk sellet diah heilich halda es en Sabbat-Dawk funn roo zumm HAH. Ennich ebbah es shaft uf sellah dawk muss shtauva.

³Diah sellet kenn feiyah shteahra in ennich's funn eiyah voon-bletz uf em Sabbat-Dawk.”

⁴Da Mosi hott zu awl di leit funn di Kinnah-Israel kshvetzt un hott ksawt, “Dess is vass da HAH gebodda hott:

⁵Funn vass diah hend unnich eich bringet en opfah zumm HAH. Ennich ebbah es en villing hatz hott soll en opfah bringa funn ennichs funn dee sacha: gold, silvah un bronze,

⁶bloh, purpel un rohdah goahn, fei linnen duch, gaysa-hoah,

⁷shohf-bokk heit es roht kfeahbt sinn, badger-heit, acacia hols,

⁸ayl fa lichtah, shpeises fa salb-ayl, un aw fa sees-shmakkich insens,

⁹onyx-shtay un anri keshtlichi shtay fa da preeshtah-shatz un's brusht-shtikk.

¹⁰Loss awl di gegawbda shaff-leit unnich eich zammah kumma un alles macha es da HAH gebodda hott:

¹¹da tempel-tent un's sach fa en ivvah-zeeya, sei hohka, beaht, braces, poshta un di fees,

¹²di lawt un iahra pohls, da gnawda-shtool un's curtain fanna droh,

¹³da dish mitt sei pohls, awl sei ksha, un's shau-broht,

¹⁴da lichtah-shtaend fa helling mitt seim ksha, di lichtah un ayl fa helling macha,

¹⁵da insens-awldah mitt sei pohls, es salb-ayl un goot-shmakkich insens, un's curtain fa di deah am tempel-tent,

¹⁶da brand-opfah awldah mitt sei bronze grate, sei pohls un awl's ksha, di bronze shissel un iahra shtaend,

¹⁷di curtains fa um da hohf rumm, di poshta un iahra fees, un's curtain fa di deah zumm hohf,

¹⁸di tent-shtikkel fa da tempel-tent un da hohf, mitt iahra shtrikk,

¹⁹di glaydah fa da deensht im Heilicha-Blatz, di heilicha glaydah fa da preeshtah Aaron, un di glaydah fa em Aaron sei boova fa da preeshtah-deensht.”

²⁰No sinn awl di leit funn di Kinnah-Israel vekk ganga fumm Mosi.

²¹Un awl dee es geahn un frei-villich gevva henn vella sinn kumma un henn em HAH opfahra gebrocht fa di eahvet uf da fasamling-tent, fa alli deensht datt drinn un fa di heilichi glaydah.

²²Awl selli es villich voahra, mansleit un veibsleit, sinn kumma un henn keshtlich sach gebrocht so vi goldichi oahra-rings, fingah-rings, oahm-rings un annah goldich shtoft. Alli-ebbah es gevva hott, hott en shving-opfah funn gold gevva.

²³Alli-ebbah es bloh, purpel adda roht duch katt hott, adda fei linnen duch, adda gaysa-hoah, adda shohf-bekk-heit es roht kfeahbt voah, adda badger-haut, hott si gebrocht.

²⁴Selli es silvah adda bronze gebrocht henn, henn's gebrocht es en opfah zumm HAH. Un selli es acacia hols katt henn fa ennich's funn di eahvet, henn's gebrocht.

²⁵Awl di veibsleit es goot shpinna henn kenna henn kshpunna mitt iahra hend un henn gebrocht vass si kshpunna katt henn in blohwah, purpelah adda rohdah goahn adda fei linnen duch.

²⁶Awl di veibsleit es villing voahra un es shpinna henn kenna, henn di gaysa-hoah kshpunna.

²⁷Di foah-gengah henn onyx-shtay un anri keshtlichi shtay gebrocht fa in da preeshtah-shatz un in's brusht-shtikk setza.

²⁸Si henn aw shpeis un ayl gebrocht fa's licht un aw fa's salb-ayl un's goot-shmakkich insens.

²⁹Awl di Kinnah-Israel es villing voahra, mansleit un veibsleit, henn frei-villich shtoft gebrocht fa di eahvet es da HAH deich da Mosi gebodda hott fa du.

³⁰No hott da Mosi ksawt zu di Kinnah-Israel, “Gukket moll, da HAH hott bei nohma da Bezaleel raus glaysa. Eah is em Uri sei boo un da Uri is em Hur sei boo funn di shtamm funn Juda.

³¹Da HAH hott een kfild mitt em Geisht Gottes in veisheit, fashtand un shiklichkeit fa alli sadda eahvet du.

³²Eah hott eem di gawb gevva fa mushtahra macha fa shaffa mitt gold, silvah un bronze,

³³fa keshtlichi shtay shneida un si eisetza, fa shaffa mitt hols un alli sadda shayni eahvet du.

³⁴Un eah hott eem un em Oholiab, em Ahisamach sei boo, funn di shtamm fumm Dan, di gawb gevva fa anri leit lanna.

³⁵Eah hott si kfild mitt veisheit fa alli sadda eahvet du; si kenna shayni sacha in gold un shtay shneida. Si kenna shayni sacha uf fei linnen duch meika un si ausnayya mitt blohwah, purpelah un rohdah goahn. Un si vissa aw vi zu duch macha un alli sadda shay shtoft macha.”