Read Pennsylvania German 2. Mosi 36 Bible Online

2. Mosi 36 - Pennsylvania German bible

2. Mosi 36

¹“Da Bezaleel un da Oholiab un awl di begawbdi mennah es da HAH goot gmacht hott droh fa da heilich-tent uf du, sella so du grawt vi da HAH gebodda hott.”

²No hott da Mosi da Bezaleel un da Oholiab un awl di begawbdi mennah es villichi hatza katt henn bei groofa fa di eahvet du.

³Un si henn awl di opfahra grikt fumm Mosi es di Kinnah-Israel gebrocht katt henn fa di eahvet ausdrawwa fumm heilicha tent uf du. Un di leit henn frei-villich ohkalda iahra kshenkah gevva zu eem alli meiya.

⁴No henn awl di goodi shaff-leit di eahvet leiya glost es si am du voahra am heilicha tent,

⁵un henn zumm Mosi ksawt, “Di leit sinn am may bringa es miah braucha fa di eahvet du es da HAH gebodda hott fa du.”

⁶No hott da Mosi en gebott gevva, “Kenn mann adda fraw soll ennich ebbes may macha fa en opfah fa da heilich-tent.” Un si henn dess vatt naus kshikt zu awl di leit. Fa sell, henn di leit nimmi may gebrocht,

⁷veil's sach es si katt henn may voah es si gebraucht henn fa awl di eahvet du.

⁸Awl di mennah unnich di shaff-leit es goot voahra droh henn da tempel-tent gmacht mitt zeyya curtains funn fei getwist linnen duch. Goodi nayyah henn goahn gnumma es bloh, purpel un roht voah un henn shayni cherubim mitt flikkel uf di dichah gnayt.

⁹Awl di curtains henn gleicha gmessa. Si voahra zvay un fatzich foos lang un sex foos brayt.

¹⁰Si henn fimf funn di curtains zammah gnayt, un no aw di anra fimfa fa zvay sets macha.

¹¹Si henn loops funn bloh duch gmacht un henn si an's end funn ay sett curtains gnayt. Si henn dess aw gedu mitt di annah sett.

¹²Si henn fuftzich loops an's end funn ay sett gnayt, un aw fuftzich loops an's end funn di annah sett. Di loops henn ufgleind an yaydahm end.

¹³No henn si fuftzich goldichi hohka gmacht un henn di zvay sett curtains zammah kanka so es da tempel-tent alles ayns voah.

¹⁴No henn si elf anri curtains aus gaysa-hoah gmacht fa ivvah da tempel-tent du.

¹⁵Awl di elf curtains henn gleicha gmessa. Si voahra fimf un fatzich foos lang un sex foos brayt.

¹⁶Si henn fimf shtikkah zammah gnayt fa ay sett macha un sex shtikkah fa di annah sett.

¹⁷Si henn no fuftzich loops an's end funn ay sett gedu un aw fuftzich an's end funn di annah sett.

¹⁸No henn si fuftzich hohka gmacht aus bronze fa di zvay sets zammah henka un alles ay shtikk macha.

¹⁹Si henn no en dach gmacht fa da tempel-tent aus shohf-bokk haut es roht kfeahbt voah. Un ivvah sell henn si noch en dach gedu es gmacht voah aus badger-haut.

²⁰Si henn frayms gmacht fa da tempel-tent aus acacia hols es ufrecht kshtanna henn.

²¹Yaydah boaht voah fuftzay foos hohch un zvay un a faddel foos brayt.

²²Yaydah boaht hott zvay zabba katt es am ay end raus kshtokka henn. Si henn awl di frayms fumm tempel-tent gmacht vi sell.

²³Si henn zvansich beaht gmacht fa di saut seit fumm tempel-tent,

²⁴un henn fatzich silvahrichi fees gmacht es unnich di beaht ganga sinn—zvay fa yaydah boaht. Ay foos is unnich yaydah zabba in di beaht ganga.

²⁵Si henn aw zvansich beaht gmacht fa di natt seit fumm tempel-tent

²⁶mitt fatzich silvahrichi fees—zvay unnich yaydah boaht.

²⁷Si henn sex beaht gmacht fa's hinnahsht end uf di west seit fumm tempel-tent,

²⁸un zvay beaht fa di ekkah am hinnahsht end.

²⁹Dee zvay beaht an di ekkah voahra zammah kohva funn unna biss ovva mitt en ring. Di zvay ekkah voahra gleicha.

³⁰So voahra's acht beaht mitt sechtzay silvahrichi fees—zvay fa yaydah boaht.

³¹Si henn no braces gmacht aus acacia hols fa ivvah-zveich an di ufrechta beaht nohch gay. Fimf braces henn di beaht zammah kohva uf ay seit fumm tempel-tent,

³²fimf braces henn di beaht zammah kohva uf di annah seit un fimf braces henn di beaht zammah kohva am hinnahsht end, uf di west seit.

³³Di braces sinn di gans leng nohch ganga uf yaydah seit, un aw an di hinnahsht seit fumm tempel-tent nohch.

³⁴Si henn di beaht es ufkshtanna henn ivvah-gezowwa mitt gold un henn goldichi rings gmacht fa di braces hayva. Di braces voahra aw ivvah-gezowwa mitt gold.

³⁵Si henn's curtain gmacht mitt blohwah, purpelah un rohdah goahn un fei getwist linnen duch. Shaff-leit es goodi nayyah voahra henn cherubim in dess curtain gnayt.

³⁶Si henn fiah poshta aus acacia hols gmacht fa's curtain, un henn si ivvah-gezowwa mitt gold. Si henn goldichi hohka gmacht fa di poshta un henn fiah silvahrichi fees gmacht fa si nei.

³⁷Fa di deah zumm tent henn si en curtain gmacht aus blohwah, purpelah un rohdah goahn un fei getwist linnen duch. Ebbah es goot nayya hott kenna hott's ausgnayt.

³⁸Si henn no fimf poshta mitt hohka gmacht fa's curtain. Si henn's evvahsht end funn di poshta un iahra ring-banda ivvah-gezowwa mitt gold. Avvah di fimf fees fa di poshta voahra gmacht aus bronze.