Read Pennsylvania German 2. Mosi 40 Bible Online

2. Mosi 40 - Pennsylvania German bible

2. Mosi 40

¹No hott da HAH ksawt zumm Mosi,

²“Uf em eahshta dawk fumm eahshta moonet solsht du da tempel-tent, da fasamling-tent, ufhokka.

³Du di bundes-lawt nei un henk's curtain fanna droh.

⁴Du da dish nei un du druff vass druff heaht. Bring da lichtah-shtaend nei un hokk di lichtah uf.

⁵Du da goldich insens-awldah fannich di bundes-lawt un du's curtain ivvah di deah zumm tempel-tent.

⁶Du da brand-opfah awldah fannich di deah fumm tempel-tent, da fasamling-tent.

⁷Du di vesh-shissel zvishich da fasamling-tent un da awldah un du vassah nei.

⁸Hokk da hohf uf drumm rumm un henk's curtain an's doah fumm hohf.

⁹Nemm's salb-ayl un salb da tempel-tent un alles es drinn is. Mach da tempel-tent un's sach es drinn is raus kshteld es heilich. Si sella heilich sei.

¹⁰Salb da brand-opfah awldah un awl sei ksha. Shtell en raus es heilich fa da awldah soll oahrich heilich sei.

¹¹Salb di vesh-shissel un iahra shtaend un shtell si raus es heilich.

¹²Bring da Aaron un sei boova an di deah fumm fasamling-tent un vesh si mitt vassah.

¹³No glayt da Aaron in di heilicha glaydah. Salb een un mach een heilich so es eah da deensht ausfiahra kann es mei preeshtah.

¹⁴Bring sei boova un glayt si in rekk.

¹⁵Salb si grawt vi du iahra daett ksalbt hosht so es si mich deena kenna es preeshtah. Dee salbung macht es si un iahra nohch-kummashaft preeshtah sinn funn nau on.”

¹⁶Da Mosi hott no alles gedu grawt vi da HAH een gebodda hott.

¹⁷So voah da tempel-tent ufkokt uf em eahshta dawk, im eahshta moonet im zvedda yoah.

¹⁸Vo da Mosi da tempel-tent ufkokt hott, hott eah di fees in da blatz gedu, hott di beaht ufkshteld, di braces nei gedu un hott di poshta ufkshteld.

¹⁹No hott eah da tent ivvah da tempel-tent gedu un hott's dach ivvah da tent gedu so vi da HAH een gebodda hott.

²⁰Eah hott di zeiknis-shtay gnumma un hott si in di lawt glaykt, hott di pohls an di lawt un hott da gnawda-shtool ovva druff gedu.

²¹No hott eah di lawt in da tempel-tent un hott's curtain fanna droh kanka so es ma di bundes-lawt nett sayna hott kenna. Dess voah vi da HAH een gebodda katt hott.

²²Da Mosi hott da dish no in da fasamling-tent gedu uf di natt seit fumm tempel-tent. Dess voah autseit fumm curtain.

²³Eah hott's shau-broht uf da dish gedu fannich da HAH vi eah een gebodda hott.

²⁴Eah hott da lichtah-shtaend in da fasamling-tent gedu uf di saut seit ufgleind mitt em dish.

²⁵No hott eah di lichtah ohkshtekt fannich da HAH vi eah een gebodda hott.

²⁶Da Mosi hott no da goldich awldah in da fasamling-tent fannich's curtain,

²⁷un hott goot-shmakkich insens gebrend druff vi da HAH een gebodda hott.

²⁸No hott eah's curtain an di deah fumm tempel-tent kanka.

²⁹Eah hott da brand-opfah awldah nayksht an di deah fumm tempel-tent im fasamling-tent, un hott brand-opfahra un shpeis-opfahra gopfaht druff grawt vi da HAH een gebodda hott.

³⁰Eah hott di vesh-shissel zvishich da fasamling-tent un da awldah, un hott vassah nei gedu fa vesha.

³¹No henn da Mosi, da Aaron un sei boova iahra hend un fees datt raus gvesha.

³²Vann si in da fasamling-tent ganga sinn, un vann si nayksht an da awldah ganga sinn, henn si sich gvesha grawt vi da HAH em Mosi gebodda gevva katt hott.

³³Da Mosi hott no da hohf ufkokt um da tempel-tent un da awldah rumm, un hott's curtain an's doah fumm hohf kanka. Sellah vayk hott da Mosi di eahvet faddich gmacht.

³⁴No hott di volk da fasamling-tent zu gedekt, un di hallichkeit fumm HAH hott da tempel-tent kfild.

³⁵Da Mosi hott nett in da fasamling-tent nei gay kenna veil di volk drivvah voah un di hallichkeit fumm HAH da tempel-tent ufkfild hott.

³⁶Deich awl di zeit es di Kinnah-Israel am rumm gay voahra, vann di volk nuff fumm tempel-tent ganga is, dann sinn si naus kshteaht.

³⁷Avvah vann di volk nett nuff ganga is, dann sinn si nett naus kshteaht biss da dawk es si viddah nuff ganga is.

³⁸Un so lang es si uf em vayk voahra is di volk fumm HAH ivvah da tempel-tent geblivva deich da dawk, un's voah feiyah in di volk deich di nacht. Dess voah fannich di awwa fumm gans haus funn Israel.