Read Pennsylvania German 2. Mosi 9 Bible Online

2. Mosi 9 - Pennsylvania German bible

2. Mosi 9

¹No hott da HAH ksawt zumm Mosi, “Gay zumm Pharao un sawk eem, ‘Dess is vass da HAH, da Gott funn di Hebrayah sawkt, “Loss mei leit gay, so es si mich deena kenna.”

²Fa vann du's nett dusht fa si gay lossa, un haldsht oh si hayva,

³dann kumd em HAH sei hand uf dei fee im feld, uf dei geil, uf dei aysla, uf dei kamayla, uf dei oxa un uf dei shohf. Es zayld en shveah peshtelens sei.

⁴Avvah da HAH zayld en unnahshitt macha zvishich em fee funn Israel un em fee funn Egypta. 'S zayld nix doht gay es zu di Kinnah-Israel heaht.’”

⁵Da HAH hott en zeit ksetzt un hott ksawt, “Meiya zayld da HAH dess ding du im land.”

⁶So hott da HAH dess ding gedu da neksht dawk. Awl's fee funn di Egyptah is doht ganga, avvah funn di Kinnah-Israel iahra fee is nett ayns doht ganga.

⁷Da Pharao hott leit naus kshikt, un geviss, es voah nett ay shtikk fee doht funn di Israeliddah iahres. Avvah em Pharao sei hatz voah hatt gmacht, un eah hott di leit nett gay glost.

⁸No hott da HAH ksawt zumm Mosi un em Aaron, “Nemmet hend foll roos funn en offa, un loss da Mosi's noch em himmel shmeisa so es da Pharao's sayna kann.

⁹Sell vatt feinah shtawb ivvah's gans land funn Egypta, un's zayla kshveahra ausbrecha mitt vayyi blakka uf di mensha un uf em fee gans deich's land funn Egypta.”

¹⁰So henn si roos funn en offa gnumma, henn fannich da Pharao kshtanna, un da Mosi hott's noch em himmel kshmissa. No sinn kshveahra ausgebrocha mitt vayyi blakka uf di leit un di diahra.

¹¹Di hexah henn nett fannich em Mosi shtay kenna veil si kshveahra katt henn, fa di kshveahra voahra aw uf di hexah grawt vi uf awl di Egyptah.

¹²Avvah da HAH hott em Pharao sei hatz hatt gmacht un eah hott eena nett abkeicht, grawt vi da HAH ksawt katt hott zumm Mosi.

¹³No hott da HAH ksawt zumm Mosi, “Shtay free uf meiya-free, gay un shtell dich fannich da Pharao un sawk zu eem, ‘Dess is vass da HAH, da Gott funn di Hebrayah, sawkt, “Loss mei leit gay, so es si mich deena kenna.

¹⁴Fa dessamohl shikk ich awl mei blohwa uf dich selvaht, dei gnechta un dei leit, so es du vissa solsht es nimmand is vi ich in di gans eaht.

¹⁵Bei nau hett ich kenda mei hand naus du un dich un dei leit shlauwa mitt peshtelens es diah gans abkshnidda gvest veahret funn di eaht.

¹⁶Avvah yusht grawt fa dee uahsach havvich dich glost layva, so es ich diah mei graft veisa kann, un es mei nohma bekand vatt deich di gans veld.

¹⁷Du haybsht dich alsnoch uf geyyich mei leit bei si nett gay lossa.

¹⁸Nau gukk moll, meiya so an dee zeit, zayl ich shveahri shlohsa shikka, so es noch nee nett ksenna voahra in Egypta fumm eahshta dawk funn Egypta biss nau.

¹⁹So nau shikk un bring dei fee un vass-evvah es kfunna is im feld rei aus em veddah. Alli mann un diah es draus im feld is un nett rei gebrocht is, vatt doht gmacht vann di shlohsa moll kumma.”’”

²⁰Selli fumm Pharao sei gnechta es furcht katt hott fa Gott sei vatt, henn iahra gnechta un fee gmacht rei kumma in di gebeiyah.

²¹Avvah selli vo sich nix bekimmaht henn veyyich Gott sei vatt, henn iahra gnechta un fee draus im feld glost.

²²No hott da HAH ksawt zumm Mosi, “Shtrekk dei hand noch em himmel so es shlohsa uf's gans land Egypta falla—uf di mensha, uf's fee un uf alli blansa fumm feld deich's land funn Egypta.”

²³Da Mosi hott no sei shtokk naus kohva noch em himmel, un da HAH hott gviddah un shlohsa kshikt, un feiyah is runnah uf di eaht kumma. So hott da HAH shlohsa runnah greyyaht uf's land Egypta.

²⁴Shlohsa sinn kfalla, un feiyahrich gviddah voah bei di shlohsa. 'S voah oahrich shlimm, so es es noch nee nett gvest voah im land Egypta siddah es es land Egypta kshteaht voah.

²⁵Shlohsa henn alles gedroffa es im feld voah deich's gans land funn Egypta, mensha un diahra. Di shlohsa henn aw awl di blansa im feld gedroffa, un alli bohm im feld voah fabrocha.

²⁶Da aynsisht blatz es kenn shlohsa voahra, voah im land Goshen vo di Kinnah-Israel voahra.

²⁷No hott da Pharao kshikt fa da Mosi un da Aaron un hott ksawt zu eena, “Ich habb ksindicht dessamohl. Da HAH is gerecht un ich un mei leit sinn Gottlohs.

²⁸Baydet zumm HAH. Miah henn genunk funn Gott sei gviddah un shlohsa. Ich loss eich gay; diah brauchet nimmi do bleiva.”

²⁹Da Mosi hott no ksawt zu eem, “So kshvind es ich aus di shtatt gay, dann shtrekk ich mei hend naus zumm HAH. No shtobt's gviddah, un's sinn kenn shlohsa may, so es du sayna kansht es di eaht zumm HAH heaht.

³⁰Avvah ich vays es du un dei gnechta eich noch nett feichet veyyich em HAH.”

³¹Da flax un da geahsht voahra hatt gedroffa un voahra fasaut, veil da geahsht in di kebb voah un da flax am bleeya voah.

³²Avvah da vaytza un spelt voahra nett fasaut veil si shpaydah zeidich vadda.

³³So is da Mosi aus di shtatt, vekk fumm Pharao ganga un hott sei hend naus kshtrekt zumm HAH. No hott's gviddah un di shlohsa kshtobt, un da reyya is nimmi runnah gleaht uf di eaht.

³⁴Vo da Pharao ksenna hott es da reyya, di shlohsa un's gviddah kshtobt henn, hott eah viddah ksindicht. Eah un sei gnechta henn iahra hatza hatt gmacht.

³⁵So voah em Pharao sei hatz hatt gmacht, un eah hott di Israeliddah nett gay glost, grawt vi da HAH ksawt katt hott deich da Mosi.