Read Pennsylvania German Hiob 10 Bible Online

Hiob 10 - Pennsylvania German bible

Hiob 10

¹“Mei ayya layva aykeld miah. Ich zayl mich gay lossa un mich beglawwa, un ich zayl shvetza mitt en sayl es biddah is.

²Ich zayl sawwa zu Gott: Du mich nett fadamma, loss mich vissa vass du geyyich mich hosht.

³Kfald's diah fa mich fafolka, fa di eahvet funn dei hend nunnah drayya, diveil es du froh bisht mitt di shkeems funn di gottlohsa?

⁴Hosht du menshlichi awwa? Dusht du sayna vi da mensh dutt?

⁵Sinn dei dawwa vi di dawwa fumm mensh, adda dei yoahra vi di yoahra funn en mann,

⁶es du suchsht fa mei faylah, un am gukka bisht fa mei sinda?

⁷Du vaysht es ich nett shuldich binn, un es nimmand mich aus dei hand nemma kann.

⁸Dei hend henn mich zammah gedu un mich gmacht, draysht du nau rumm un fadaubsht mich?

⁹Denk droh es du mich gmacht hosht aus eaht. Zaylsht du mich nau viddah zu shtawb drayya?

¹⁰Hosht du mich nett ausgleaht vi millich, un mich shaydich gmacht vi kays?

¹¹Hosht du mich nett geglayt mitt haut un flaysh, un mich zammah gedu mitt gnocha un flexa?

¹²Du hosht miah layva gevva un voahsht bamhatzich zu miah; un hosht ivvah mei geisht gvatsht.

¹³Un doch hosht du dee sach in deim hatz katt, ich vays es dess in dei meind voah:

¹⁴Du bisht am vatsha fa sayna eb ich sindicha du, un dusht's nett fa mei shuld fagevva.

¹⁵Vann ich gottlohs binn, dann vay zu miah! Un even vann ich gerecht binn, dann dauf ich mei kobb nett uf hayva, fa ich binn ivvah-gnumma mitt mei shohm un dreebsawl.

¹⁶Vann ich mei kobb uf hayb, dann hundsht du mich vi en layb, un veisht viddah dei vundahboahri macht geyyich mich.

¹⁷Du bringsht neiyi zeiya geyyich mich, un dei zann geyyich mich vatt graysah; du shiksht druvvel uf mich ivvah un ivvah.

¹⁸Favass hosht du mich aus em muddahs-leib gebrocht? Ich vott ich veah kshtauva eb ennich awk mich ksenna hett.

¹⁹Oh, vann ich yusht nee nett gvest veah, adda vann ich yusht grawt in's grawb ganga veah fumm muddahs-leib!

²⁰Sinn nett mei poah dawk shiah goah ivvah? Loss mich gay, so es ich bissel frayt havva kann

²¹eb ich anna gay vo ich nee nett zrikk kumm, in's land funn shadda un dunkelheit,

²²in's land funn di deefsht nacht un deefah shadda, vo alles deich-nannah is, vo even's licht is vi's dunkla.”