Read Pennsylvania German Hiob 13 Bible Online

Hiob 13 - Pennsylvania German bible

Hiob 13

¹“Mei awwa henn awl dess ksenna; mei oahra henn's keaht un's fashtanna.

²Vass diah visset, vays ich aw; ich binn nett vennichah es diah.

³Avvah ich dayt gleicha shvetza zumm Awlmechticha, un eem veisa es ich unshuldich binn.

⁴Avvah diah dekket alles zu mitt leeya; diah sind awl doktah es nix veaht sinn.

⁵Ich vott diah veahret awl shtill; sell dayt eiyah veisheit veisa.

⁶Heichet ab vass ich zu sawwa habb, un meiket di sacha es ich shvetz diveyya.

⁷Shvetzet diah fa Gott mitt falshheit; maynet diah es diah am shvetza sind fa Gott mitt leeya?

⁸Zayla diah eich kfellich macha zu Gott, zaylet diah sei lawyah sei?

⁹Dayt's goot ausdrayya fa eich vann eah eich unnah-sucha dayt? Kendet diah een fafiahra vi mensha fafiaht sei kenna?

¹⁰Eah dutt geviss eich zanka vann diah ayseidich sind hinna rumm.

¹¹Dayt nett sei hallichkeit eich fagelshtahra? Dayt nett da angsht funn eem uf eich falla?

¹²Eiyah aldi shpricha sinn vi esh, eiyah vadda sinn so shvach es vi ebbes gmacht funn clay.

¹³Seind shtill un losset mich shvetza, es mawk ivvah mich kumma vass vill.

¹⁴Favass nemm ich mei flaysh zvishich mei zay, un nemm mei layva in mei hend?

¹⁵Even vann eah mich doht macht, doch doon ich mei hofning in een, un zayl mei vayk fa'andvadda fannich sei ksicht.

¹⁶Yau, dess zayld mich frei macha, veil kenn gottlohsah mensh drauwa dayt fannich een kumma.

¹⁷Heichet goot ab zu mei vadda, un losset eiyah oahra einemma vass ich sawk.

¹⁸Saynet nau, ich habb alles pinklich zammah gedu fa mei seit veisa; ich vays es Gott mich unshuldich finna zayld.

¹⁹Kann ennich ebbah ebbes geyyich mich finna? Vann's kann, dann binn ich shtill un shteahb.

²⁰Avvah gebb miah yusht dee zvay sacha, no doon ich mich nett fashtekla funn diah.

²¹Nemm dei hand ab funn miah, un heah uf mich fagelshtahra un mich engshtlich macha.

²²No roof mich un ich gebb diah andvat, adda loss mich shvetza, un du gebsht miah andvat.

²³Vee grohs sinn mei shulda un mei sinda? Veis miah mei sind un vo ich ivvah-gedredda habb.

²⁴Favass fashtekkelsht du dei ksicht, un haldsht mich es dei feind?

²⁵Machsht du en geblohsani lawb-blatt ziddahra? Adda gaysht du em drukka shprau nohch?

²⁶Fa du shreibsht biddah sach nunnah geyyich mich, un machsht mich mei sinda funn yungem uf eahva.

²⁷Du bindsht mei fees mitt kedda, un vatsht awl mei pawda, bei dei awwa uf di foos-dabba funn mei fees halda.

²⁸Fasell binn ich am fagay vi en fafauld ding, vi en shtikk glaydah es fafressa is bei di shawva.”