Read Pennsylvania German Hiob 15 Bible Online

Hiob 15 - Pennsylvania German bible

Hiob 15

¹No hott da Eliphas funn Theman ksawt,

²“Sett en mann mitt veisheit so ufgeblohsani vadda sawwa, un sei bauch uf filla mitt em vind funn di east?

³Sett eah sich fa'andvadda mitt vadda es nix sawwa, mitt shvetzes es nix veaht is?

⁴Du dusht vekk mitt di Gottes-furcht, un haldsht leit funn Gott ohbayda.

⁵Dei maul vatt gland bei dei shuld, un du nemsht di vadda oh funn di shlichticha.

⁶Dei ayya maul fadamd dich, un nett ich; dei aykni leftz zeiya geyyich dich.

⁷Bisht du da eahsht mensh es geboahra voah? Voahsht du geboahra eb di hivla?

⁸Voahsht du am abheicha vo Gott sei himlishah roht gevva hott? Heaht di veisheit zu diah laynich?

⁹Vass vaysht du es miah nett vissa? Vass fashtaysht du es miah nett fashtayn?

¹⁰Di veis-grohwa un di alda mennah sinn unnich uns rumm, selli es eldah sinn es dei daett.

¹¹Is da drohsht funn Gott nett genunk fa dich, adda di vadda es sanftmeedich gevva voahra zu diah?

¹²Favass losht du dei hatz dich vekk drawwa? Favass losht du dei awwa zannich vadda,

¹³so es du dei geisht geyyich Gott draysht, un losht so vadda aus deim maul kumma?

¹⁴Vass is en mensh, es eah rein sei sett, adda ebbah es geboahra is funn en veibsmensh, es eah gerecht sei sett?

¹⁵Gott dutt sei fadrauwes nett in sei heilichi, un di himla sinn nett rein fannich eem.

¹⁶Vee feel vennichah is da mensh, deah es grausam un fadrekt is, deah es evil drinkt vi vassah?

¹⁷Heich mich ab, ich vill diah sacha sawwa; ich vill diah sawwa vass ich ksenna habb,

¹⁸vass mennah mitt veisheit ksawt henn, un nett fashtekkeld henn vass si grikt henn funn iahra feddah;

¹⁹zu eena laynich voah's land gevva, un kenn fremdah voah alawbt fa unnich eena sei.

²⁰Da gottlohs is kshtrohft mitt shmatza sei layva lang, un di yoahra funn sellah es leit nunnah drett sinn gnambaht.

²¹Vass eah heaht, fagelshtaht een, un diveil es eah fridda hott, kumd sellah ivvah een es fadaubt.

²²Eah glawbt nett es eah zrikk kumd fumm dunkla, eah is gmeikt fa's shvatt.

²³Eah lawft rumm am gukka fa ess-sach, un sawkt, ‘Vo is es?’ Eah vayst es di dunkelheit nayksht is.

²⁴Angsht un furcht fagelshtahra een, si kumma ivvah een vi en kaynich grisht fa greek,

²⁵veil eah sei fausht shiddeld geyyich Gott, un draut sich ufshtella geyyich da Awlmechtich,

²⁶un shpringd fassich geyyich een, mitt sei grohsah shield.

²⁷Sei ksicht is dikk mitt fett, un fett is um sei bauch rumm,

²⁸avvah eah zayld in fadauvani shtett voona, in heisah vo nimmand drinn voond, heisah es am nunnah falla sinn.

²⁹Eah zayld nimmi reich sei; vass eah aykend gayt faloahra, sei frucht beekt sich nimmi nunnah uf's land.

³⁰Eah kumd nett vekk fumm dunkla, es flamm drikkeld sei blansa uf, un da ohften funn Gott sei maul drawkt een vekk.

³¹Loss een sich nett fafiahra bei in sell drauwa es nix veaht is, fa eah zayld nix zrikk greeya.

³²Eah vatt foll betzawld eb sei zeit, un sei nasht zayld nett gree sei.

³³Eah zayld sei vi en drauva-rank es sei greeni drauva faliaht, vi en ayl-bohm es sei blumma faliaht.

³⁴Fa di gottlohsa leit sinn unfruchtboah, un feiyah brend di tents uf funn di uneahlicha.

³⁵Si henn im sinn fa druvvel macha un evil du, un iahra meind risht sich fa fafiahra.”