Read Pennsylvania German Hiob 16 Bible Online

Hiob 16 - Pennsylvania German bible

Hiob 16

¹No hott da Hiob ksawt,

²“Ich habb so shtoft shund oft keaht; diah sind oahrichi drayshtah.

³Zayla eiyah lang-vindichi vadda nee nett shtobba? Vass fayld eich es diah ohhaldet shvetza?

⁴Ich kend aw shvetza vi diah doond, vann diah in mei blatz veahret. Ich kend vadda geyyich eich sawwa, un mei kobb shidla geyyich eich.

⁵Avvah ich dayt eich greftich macha mitt mei maul, un da drohsht funn mei leftz dayt eich bessah feela macha.

⁶Vann ich shvetz dann sinn mei shmatza nett vennichah, un vann ich zrikk hayb dann gayn si nett vekk.

⁷Avvah nau hott Gott mich ausgvoahra, un mei gansi family zu nix gebrocht.

⁸Eah hott mich gans runslich gmacht, un's zeikt geyyich mich. Ich binn yusht may haut un gnocha, un dess shvetzt aw geyyich mich.

⁹Eah hast mich un sei zann hott mich farissa; eah beist sei zay geyyich mich un vatsht mich mitt baysi awwa.

¹⁰Leit macha iahra maul uf un shvetza geyyich mich; si shlauwa mich uf da bakka; si gayn zammah fa geyyich mich shaffa.

¹¹Gott hott mich ivvah-gedrayt zu ungerechti mennah, un hott mich in di hend funn di gottlohsa kumma glost.

¹²Es voah am goot gay mitt miah, avvah eah hott mich fabrocha; eah hott mich gnumma beim hals un mich fashiddeld; eah hott geyyich mich gezeeld.

¹³Sei sheesah sinn gans um mich rumm, unni fashtand gayn sei arrows in mei niahra, un leahra mei gall aus uf da grund.

¹⁴Ivvah un ivvah brecht eah deich mich vi deich en vand, un shpringd geyyich mich vi en greeks-mann.

¹⁵Ich habb sakk-glaydah ivvah mei haut gnayt, un habb mei shtann in da shtawb gedu.

¹⁶Mei ksicht is roht funn heila, un mei awwa sinn kshvulla un dunkel.

¹⁷Avvah mei hend henn nimmand ebbes gedu, un mei gebayt is rein.

¹⁸Oh eaht, dekk nett mei bloot zu, un loss mei roofes kenn roo-blatz finna.

¹⁹Even nau is mei zeiknis im himmel, un deah vo shvetzt fa mich drovva in di hay.

²⁰Mei freind fashpodda mich; vi ich zu Gott roof, lawft's awwa-vassah.

²¹Oh vann yusht da mensh zu Gott roofa kend, vi en mann dutt zu sei nochbah.

²²Es zayla yusht vennich yoahra fabei gay, biss ich anna gay vo ich nimmi zrikk kumma kann.”