Read Pennsylvania German Hiob 17 Bible Online

Hiob 17 - Pennsylvania German bible

Hiob 17

¹“Mei ohften is shvach; mei dawwa zayla nett lang sei, 's grawb is am voahra fa mich.

²Shpoddah sinn um mich rumm, un ich muss vatsha diveil es si mich fafolka.

³Oh HAH, shtay goot fa mich mitt diah selvaht; veah shunsht shtayt goot fa mich?

⁴Du hosht iahra hatz kalda funn fashtay, fasell zaylsht du si halda funn mich nunnah du.

⁵Vann ebbah sei freind faroht so es eah en dayl funn seim sach grikt, dann zayla sei kinnah leida difoah.

⁶Gott hott mich en kshvetz gmacht zu di leit, en mann es leit in's ksicht shpautza.

⁷Mei awk is dunkel vadda funn dreebsawl, mei eahm un bay sinn vi en shadda.

⁸Ufrichtichi leit sinn fashtaund ivvah dess, un di unshuldicha shtadda sich uf geyyich di ungettlicha.

⁹Avvah di gerechta halda oh iahra vayk gay, un selli mitt reini hend vadda shteikah.

¹⁰Kummet nau, un sawwet viddah vass diah am sawwa voahret; ich finn nett ay mann unnich eich mitt veisheit.

¹¹Mei dawwa sinn faddich; vass ich du habb vella is zu nix kumma, un awl sell es in meim hatz voah.

¹²Dee mennah vella di nacht zu dawk drayya; diveil es es dunkel is, sawwa si's licht is nayksht.

¹³Vann's grawb di hofning funn mei haymet is, dann mach ich mei bett im dunkla.

¹⁴Vann ich's grawb mei faddah hays, un di veahm mei muddah adda mei shveshtah hays,

¹⁵vo dann is mei hofning? Veah kann hofning sayna fa mich?

¹⁶Gayt di hofning mitt miah nunnah in's grawb? Gayn miah mitt-nannah nunnah in da shtawb?”