Read Pennsylvania German Hiob 18 Bible Online

Hiob 18 - Pennsylvania German bible

Hiob 18

¹No hott da Bildad funn Suah ksawt,

²“Vee lang zaylsht du vadda macha? Grikk eisicht, no kenna miah shvetza.

³Favass sinn miah ohksenna es vi fee, un sinn gnumma es leah-kebbich in dei awwa?

⁴Du dusht dich yusht selvaht vay mitt deim zann. Soll di eaht falossa sei fa dei sayk? Sella di shtay aus iahra blatz gnumma sei?

⁵Es licht fumm gottlohsa gayt aus, di flamm funn sei feiyah gebt kenn helling.

⁶Es licht in sei tent vatt dunkel, un's licht ovvich eem gayt aus.

⁷Sei greftichah shritt vatt katzah, un sei ayknah roht macht een falla.

⁸Sei shritt shmeist een in's net, un sei fees vadda kfanga bei di shtrikk.

⁹En fall fangd een bei sei heel, un's net haybt een fesht.

¹⁰Da shtrikk is fashtekkeld fa een im grund, un di fall is in sei pawt.

¹¹Alles um een rumm fagelshtaht een mitt angsht, un dess gayt eem nohch mitt alli shritt.

¹²Sei grefta vadda vennichah mitt hungah, shreklichi sacha sinn am voahra fa een falla macha.

¹³Grankheit fazeaht sei haut, un's eahsht-geboahra fumm doht frest sei eahm un bay.

¹⁴Da sayf roo funn seim tent vatt eem vekk gnumma, un eah vatt zumm kaynich funn angsht gnumma.

¹⁵In seim tent is nix es zu eem heaht, un shvevvel vatt ausnannah kshtroit drinn rumm.

¹⁶Sei vatzla fadrikla unna drunnah, un sei nesht favelka ovva droh.

¹⁷Sei ohdenkes vatt fagessa uf di eaht, un eah hott kenn nohma im land.

¹⁸Eah is fumm licht in's dunkla gedrivva, un is vekk gedrivva funn di leit in di veld.

¹⁹Eah hott kenn nohch-kummashaft unnich sei leit, nimmand is ivvahrich funn sei haymet vo eah glaybt hott.

²⁰Awl selli funn di east biss zu di west zayla heahra vass gevva hott mitt eem, un si zayla sich oahrich fashtauna.

²¹Dess is geviss vass gebt mitt selli es ungettlich sinn, mitt selli es Gott nett achta.”