Read Pennsylvania German Hiob 19 Bible Online

Hiob 19 - Pennsylvania German bible

Hiob 19

¹No hott da Hiob ksawt,

²“Vee lang zaylet diah mei sayl gvayla, un mich in shtikkah fabrecha mitt vadda?

³Diah hend mich nau zeyya mohl faniddaht; diah shemmet eich nett fa miah letz du.

⁴Even vann ich letz gedu habb, sell bleibt mitt miah, nett eich.

⁵Vann diah eich ovvich mich hayva vellet, un miah mei shanda veisa vellet,

⁶dann sellet diah vissa es Gott miah letz gedu hott, un hott sei net um mich rumm gedu.

⁷Even vann ich sawk, ‘'S voah miah letz gedu,’ dann grikk ich kenn andvat. Ich roof fa hilf, avvah's vatt nett recht gmacht.

⁸Eah hott mei vayk zu gmacht so es ich nett gay kann; eah hott mei pawda dunkel gmacht.

⁹Eah hott mei eah vekk gnumma funn miah, un hott da krohn ab funn meim kobb gnumma.

¹⁰Eah hott mich ivvahrawlich nunnah gebrocha biss ich faddich binn, eah hott mei hofning raus grissa vi en bohm.

¹¹Sei zann brend geyyich mich, un eah nemd mich es sei feind.

¹²Sei greeks-gnechta kumma zammah, un bauwa iahra vayk geyyich mich; si setza sich uf um mei tent rumm.

¹³Eah hott mei breedah veit vekk gedu funn miah, ich binn fremd zu selli es mich gekend henn.

¹⁴Mei naykshti freindshaft hott mich falossa, un mei freind henn mich fagessa.

¹⁵'S psuch in meim haus un mei mawda nemma mich fa en fremdah; ich binn unbekand zu iahra awwa.

¹⁶Ich roof mei gnecht, avvah eah gebt kenn andvat, ich muss een bedla mitt mei maul fa kumma.

¹⁷Mei fraw kann mei ohften nett shtenda, ich binn grausam zu mei breedah.

¹⁸Even di glenna kinnah vella nix zu du havva mitt miah, vann ich uf shtay, fashpodda si mich.

¹⁹Awl mei kumrawda hassa mich, un selli es ich leeb habb, henn sich geyyich mich gedrayt.

²⁰Mei gnocha henka zu mei haut un flaysh, ich binn yusht gnabs deich kumma mitt meim layva.

²¹Davvahret mich, mei freind, davvahret mich, fa di hand funn Gott hott mich kshlauwa.

²²Favass doond diah mich fafolka vi Gott dutt, un kennet nett satt vadda funn meim flaysh?

²³Oh, vann yusht mei vadda anna kshrivva veahra, vann si yusht in en buch kshrivva veahra.

²⁴Ich vott si veahra ayvichlich in shtay kakt mitt en eisichah maysel, un ufkfild mitt lead.

²⁵Ich vays es mei Frei-Shtellah laybt, un am end zayld eah uf di eaht shtay.

²⁶Even noch demm es mei haut zu nix gebrocht is, doch in meim flaysh zayl ich Gott sayna.

²⁷Ich zayl een selvaht sayna, mitt mei aykni awwa, un nimmand shunsht. Ich habb en falanga in meim hatz.

²⁸Vann diah sawwet, ‘Vee vella miah een fafolka, un en sach finna geyyich een?’

²⁹No seddet diah eich selvaht feicha veyyich em shvatt, fa da zann bringd en shtrohf beim shvatt, so es diah vissa kennet es en gericht kumd.”