Read Pennsylvania German Hiob 2 Bible Online

Hiob 2 - Pennsylvania German bible

Hiob 2

¹No voah viddah en dawk vo di kinnah funn Gott sich fasammeld henn fannich em HAH, un da Satan is aw mitt eena kumma fa sich fannich da HAH shtella.

²Da HAH hott no da Satan kfrohkt, “Vo kumsht du bei?” Da Satan hott andvat gevva zumm HAH un hott ksawt, “Ich binn kumma funn zrikk un faddi lawfa ivvah di eaht.”

³No hott da HAH ksawt zumm Satan, “Hosht du acht katt funn meim gnecht da Hiob? 'Sis nimmand uf di eaht vi een. Eah is unshuldich un ufrichtich, en mann es Gottes-furcht in sich hott, un sich vekk hald funn evil. Du hosht mich nei kshvetzt fa dich lossa een fadauva unni uahsach, avvah eah is alsnoch shtandhaftich.”

⁴Da Satan hott ksawt zumm HAH, “Haut fa haut. En mann gebt alles es eah hott fa sei ayya layva.

⁵Avvah shtrekk dei hand naus un rayk sei flaysh un gnocha oh, no faflucht eah dich in dei ksicht.”

⁶Da HAH hott no ksawt zumm Satan, “Awl recht, eah is in dei hend, avvah du daufsht een nett doht macha.”

⁷No is da Satan vekk fumm HAH ganga un hott gmacht es veeshti kshveahra ausgebrocha sinn gans ivvah da Hiob, funn di sohla funn sei fees biss nuff ovva uf sei kobb.

⁸No hott da Job fabrocha ksha gnumma un sich kshawbt diveil es eah uf en haufa esh kokt hott.

⁹Sei fraw hott ksawt zu eem, “Bisht du alsnoch am ohhayva zu deim glawva? Fafluch Gott un shtaub.”

¹⁰Eah hott ksawt zu iahra, “Du shvetsht vi di dumma veibsleit shvetza. Sedda miah goodi sacha ohnemma funn Gott un nett shlechti?” Deich awl dess hott da Hiob nett ksindicht mitt sei leftz.

¹¹Drei fumm Hiob sei freind voahra da Eliphas funn Theman, da Bildad funn Suah un da Zophar funn Naamah. Vo si auskfunna henn vass da Hiob am deich macha voah, henn si ausgmacht fa zammah kumma un gay een drayshta.

¹²Vo si een ksenna henn funn noch veit ab, henn si een nett gekend. No henn si ohkfanga laut veina, henn iahra glaydah farissa un henn shtawb geyyich da himmel kshmissa un uf iahra kebb.

¹³No henn si mitt eem uf da bodda kokt fa sivva dawk un necht. Nimmand hott en vatt ksawt veil si ksenna henn vi oahrich es eah am soffahra voah.