Read Pennsylvania German Hiob 20 Bible Online

Hiob 20 - Pennsylvania German bible

Hiob 20

¹No hott da Zophar funn Naamah ksawt,

²“Mei gedruvveldi gedanka macha mich andvat gevva veil's miah oahrich shveah is.

³Ich binn grikt ivvah dei vadda, un mei eisicht gebt miah's recht fa diah andvat gevva.

⁴Vaysht du nett vi's voah funn aldi zeida, gans zrikk vo da mensh seahsht uf di eaht gedu voah,

⁵es di gottlohsa nett lang fraylich sinn, un di frayt funn en evilah mann gans katz is?

⁶Even vann sei hohchmoot in di himla langd, un sei kobb so hohch is es di volka,

⁷zayld eah ayvichlich zu nix gebrocht vadda, so vi sei misht, un selli es een ksenna henn zayla sawwa, ‘Vo is eah?’

⁸Vi en drohm fleekt eah vekk, un kann nimmi kfunna sei; vi en vision in di nacht, vatt eah fatt gyawkt.

⁹Es awk es een ksenna hott, zayld een nimmi sayna, un eah vatt aw nimmi ksenna datt vo eah als gvoond hott.

¹⁰Sei kinnah zayla bedla funn di oahma, un sei hend missa zrikk gevva vass eah gnumma hott.

¹¹Sei gnocha sinn noch yung un foll graft, avvah glei zayld sei graft mitt eem im shtawb leiya.

¹²Even vann evil sees is in sei maul, un eah fashtekkeld's unnich sei zung,

¹³un even vann eah's nett shtenda kann fa's ufgevva, un hald's in sei maul,

¹⁴doch dutt sei ess-sach savvah drayya in sei mawwa, un vatt vi's gift funn shlanga in eem.

¹⁵Eah shpautzt sei reichheit raus es eah kshlukt hott, Gott macht een si ruff bringa aus seim mawwa.

¹⁶Eah sukkeld's gift funn shlanga, un di zung funn di shlang macht een doht.

¹⁷Eah zayld di vassah-grikka nett sayna, di revvahra es lawfa mitt hunnich un millich.

¹⁸Vass eah kshaft hott difoah muss eah zrikk gevva, un sell vass eah fahandeld hott grikt eah nett di blesiah fa's gleicha.

¹⁹Eah hott di oahma nunnah gedredda un si falossa, eah hott heisah gnumma es eah nett gebaut hott.

²⁰Eah kann nee nett genunk greeya, eah is so greedich es eah nix halda kann es eah gleicht.

²¹Nix is ivvahrich fa een zu fressa, so zayld sei goot layva nett ohhalda.

²²Even diveil es eah blendi hott, vatt's eem doch angsht, di hand funn alli-ebbah es leida dutt kumd geyyich een.

²³Vann eah sei bauch uf fild, zayld Gott sei gleedichah zann uf een shikka. Gott sei zann zayld sei ess-sach sei.

²⁴Eah zayld shpringa funn en eisichi shvatt, avvah en arrow funn bronze zayld een dreffa.

²⁵Da arrow kumd aus seim bukkel, da sheinich shpitza gayt deich sei levvah, un shreklichah angsht kumd ivvah een.

²⁶Di dunkelheit is am voahra fa sei keshtlichi sacha, feiyah es nimmand blohst zayld een ufbrenna, es frest vass ivvahrich is in seim tent.

²⁷Di himla dekka sei sinda ab, un di eaht setzt sich geyyich een.

²⁸Di sacha in seim haus vadda vekk gvesha, 's vassah funn Gott sei zann nemd's vekk.

²⁹Dess is em gottlohsa mensh sei lohn funn Gott, sei eahbshaft es eem gevva is bei Gott.”