Read Pennsylvania German Hiob 21 Bible Online

Hiob 21 - Pennsylvania German bible

Hiob 21

¹No hott da Hiob ksawt,

²“Heichet mich goot ab, sell is da aynsisht drohsht es ich frohk funn eich.

³Sind geduldich mitt miah diveil es ich shvetz, un vann ich faddich binn, kennet diah shpodda.

⁴Is mei glawk geyyich mensha? Favass sett ich nett ungeduldich sei?

⁵Gukket an mich un seind fashtaund, doond eiyah hand ivvah eiyah maul.

⁶Vann ich an dess denk, is es miah angsht, un ich fang oh ziddahra.

⁷Favass halda di gottlohsa oh layva, vadda ald un vadda mechtich mitt graft?

⁸Iahra kinnah sinn um si rumm, un iahra nohch-kummashaft is bei eena.

⁹Iahra haymeda sinn sayf un unni furcht, un Gott dutt si nett shtrohfa mitt sei shtekka.

¹⁰Alli-mohl es iahra bulla un kee zammah gedu sinn, vadda di kee drawwich, un iahra kelvah kumma nett eb zeit.

¹¹Iahra kinnah shpeela vi lemmah in en drubb shohf; iahra glenni shpringa rumm heah.

¹²Si singa mitt di tambourines un harfa, un dansa diveil es di flute shpeeld.

¹³Dee leit iahra layva is goot biss si ald vadda, un in fridda gayn si nunnah in's grawb.

¹⁴Avvah doch sawwa si zu Gott, ‘Loss uns gay! miah vella dei vayya nett vissa.

¹⁵Veah is da Awlmechtich, es miah een deena sedda? Vass goot veah's zu uns fa bayda zu eem?’

¹⁶Nau heichet moll, dee leit mayna si macha sich selvaht goot ab, avvah ich nemm nett oh vass dee gottlohsi leit sawwa.

¹⁷Vee oft vatt's licht funn di gottlohsa ausgmacht? Vee oft kumd unglikk uf si? Hott Gott selayva di ungettlicha kshtrohft in sei zann,

¹⁸un si vekk geblohsa vi shtroh im vind, adda vi shprau es fatt gedrawwa vatt im shtoahm?

¹⁹Diah glawvet es Gott en kind shtrohft fa di sinda funn sei daett. Nay! Loss Gott di sindah selvaht shtrohfa, so es si vissa es es is fa iahra sinda.

²⁰Loss si iahra shtrohf sayna mitt iahra aykni awwa, loss si selvaht da zann fumm Awlmechticha drinka.

²¹Vass gevva si drumm vass es gebt mitt iahra kinnah noch eena, vann moll awl di moonada es eena gevva voahra abkshnidda sinn.

²²Kann ennich ebbah Gott veisheit lanna, siddah es eah even di haychshta richt?

²³Ay-ebbah shteahbt diveil es eah noch frish un ksund is, eah brauch sich nett bekimmahra un sich nett feicha.

²⁴Sei millich-aymah is foll millich, un sei gnocha sinn nett ufgedrikkeld.

²⁵Avvah ebbah shunsht shteahbt mitt en bedreebdi sayl, un hott nee kenn goot layva fasucht.

²⁶Avvah si leiya awl zvay nayvich nannah im grund, un di veahm dekka si zu.

²⁷Gukk moll, ich vays eiyah gedanka, un eiyah shkeems fa miah letz du.

²⁸Diah frohwet, vo is es haus fumm grohsa mann, un da tent vo di gottlohsa voona?

²⁹Hend diah nee nett selli kfrohkt es rumm heah gayn, un iahra zeiknis ohgnumma es si zrikk bringa?

³⁰Si sawwa es da evil mann vatt nett kshtrohft, es eah vatt vekk kfiaht uf em dawk funn zann.

³¹Veah sawkt eem in's ksicht vass eah fadeend hott? Veah betzawld een zrikk fa vass eah gedu hott?

³²Diveil es eah in da grawb-hohf gedrawwa vatt, doon leit ivvah sei grawb vatsha.

³³Di sholla fumm grawb sinn sees zu eem; alli-ebbah in di leicht kumd eem nohch, un feel leit gayn fanna heah.

³⁴So vi kennet diah mich drayshta mitt eiyah dummi vadda? Nix funn eiyah kshvetz is ivvahrich es yusht falshheit.”