Read Pennsylvania German Hiob 22 Bible Online

Hiob 22 - Pennsylvania German bible

Hiob 22

¹Da Eliphas funn Theman hott no ksawt,

²“Kann ennichah mensh Gott raus helfa? Kann even en mensh mitt veisheit eem helfa?

³Vass fa blesiah veah's zumm Awlmechticha vann du gerecht veahsht? Vass goot dayt's eem du vann du unshuldich veahsht?

⁴Is es fa dei Gottes-furcht es eah dich shtrohft, un dich richta dutt?

⁵Is es nett fa dei grohsi ungerechtichkeit? Sinn nett dei sinda unni end?

⁶Du hosht dei breedah geld glaynd un funn iahra sacha zrikk kalda unni uahsach, du hosht iahra glaydah gnumma un si nakkich glost.

⁷Du hosht di dashticha kenn vassah gevva, un hosht's ess-sach funn di hungahricha kalda.

⁸Du voahsht en mechtichah mensh mitt land, un hosht dei freind glost druff voona.

⁹Du hosht di vitt-veivah leah vekk kshikt; du hosht di kinnah unni eldra nunnah gedredda.

¹⁰Sell is favass es falla gans um dich rumm sinn, un furcht dich bletzlich ivvah-gnumma hott.

¹¹Sell is favass es es dunkla dich hald funn sayna, un's vassah dich zu dekt.

¹²Is nett Gott hohch drovva im himmel? un gukk moll vi hohch drovva es di haychshta shtanna sinn!

¹³Doch sawksht du, ‘Vass vayst Gott? Kann eah richta vann eah hinnich dunkli volka is?

¹⁴Di volka shneida een ab, so es eah uns nett sayna kann, un eah lawft datt drovva rumm im himmel.’

¹⁵Zaylsht du ohhalda da ald vayk gay, es gottlohsi mennah ganga sinn?

¹⁶Si voahra vekk gedrawwa eb's iahra zeit voah, es vassah hott iahra grund vekk gvesha.

¹⁷Si henn ksawt zu Gott, ‘Loss uns gay! Vass kann da Awlmechtich du zu uns?’

¹⁸Doch hott eah iahra heisah kfild mitt goodi sacha, avvah ich fashtay da roht funn di gottlohsa nett.

¹⁹Di gerechta sayna di ungettlicha iahra shtrohf, un sinn froh, un di unshuldicha fashpodda si.

²⁰Si sawwa, ‘Unsah feinda sinn abkshnidda, un vass ivvahrich is hott's feiyah ufgebrend.’

²¹Nau gebb dich ivvah zu Gott un mach fridda mitt eem, no kumd feel goodes datt raus.

²²Nemm lanning funn sei maul, un layk sei vadda uf in dei hatz.

²³Vann du zrikk draysht zumm Awlmechticha, no vasht du ufgebaut; vann du ungerechtichkeit vekk dusht funn deim haus,

²⁴un shmeisht dei gold in da shtawb, un shtroisht dei gold funn Ophir rumm unnich di grikka shtay,

²⁵no zayld da Awlmechtich dei gold sei, un aw dei keshtlich silvah.

²⁶No zaylsht du dich froiya im Awlmechticha, un zaylsht dei ksicht nuff hayva zu Gott.

²⁷Du zaylsht bayda zu eem, un eah heaht dich, un du dusht vass du fashprocha hosht zu eem.

²⁸Vass du diah foah-nemsht zayld goot ausdrayya, un's licht zayld uf dei vayya sheina.

²⁹Selli es sich daymeedicha, haybt eah uf, un selli es iahra awwa nunnah drayya, helft eah.

³⁰Even sellah es nett unshuldich is, kann frei gmacht sei, eah vatt frei gmacht deich di reinichkeit funn dei hend.”