Read Pennsylvania German Hiob 23 Bible Online

Hiob 23 - Pennsylvania German bible

Hiob 23

¹No hott da Hiob ksawt,

²“Heit is mei glawk alsnoch biddah; sei hand is shveah uf miah even vann ich mich fayammahra du.

³Vann ich yusht vist vo een zu finna, un zu sei shtool kumma kend.

⁴No kend ich mei seit funn di sach auslayya zu eem, un eem's veisa mitt mei maul.

⁵Ich kend no ausfinna vass eah miah andvadda dayt, un fashtay vass eah zu sawwa hott zu miah.

⁶Dayt eah awl sei macht yoosa geyyich mich? Nay, eah dayt mich abheicha.

⁷Datt kann en ufrichtichah mensh sei sach fannich een du, un ich dayt fa'immah frei vadda funn mei richtah.

⁸Avvah vann ich fassich gay, dann is eah nett datt, vann ich hinnahsich gay, kann ich een nett finna.

⁹Vann eah shaft uf di lings seit, kann ich een nett sayna, un vann eah rechts drayt, kann ich een nett fameika.

¹⁰Avvah eah vayst da vayk es ich gay; vann eah mich moll broviaht hott, dann kumm ich raus vi pyuah gold.

¹¹Ich habb mei foos grawt in sei pawt kalda; ich habb sei vayk kalda un binn nett vekk gedrayt.

¹²Ich habb's gebott funn sei leftz nett ivvah-gedredda; di vadda funn sei maul sinn may keshtlich zu miah es ess-sach.

¹³Avvah eah shtayt laynich; veah kann geyyich een gay? Eah dutt vass eah vill.

¹⁴Eah drawkt aus vass eah auskshprocha hott veyyich miah, un feel so sacha es noch in sei meind sinn.

¹⁵Sell is favass es ich oahrich engshtlich binn fannich eem, vann ich ivvah dess denk, feich ich mich veyyich eem.

¹⁶Gott hott mei hatz shvach gmacht; da Awlmechtich hott mich fagelshtaht.

¹⁷Avvah doch binn ich nett shtill gmacht beim dunkla, un aw nett veil's dunkla mei ksicht zu dekt.”