Read Pennsylvania German Hiob 24 Bible Online

Hiob 24 - Pennsylvania German bible

Hiob 24

¹“Favass dutt da Awlmechtich nett en zeit setza fa richta? Un favass doon selli es een kenna, een nett sayna dess ausdrawwa?

²Mennah moofa di meik-shtay fa may land greeya, si shtayla shohf un doon si in iahra vayt.

³Si dreiva di aysla vekk es zu selli heahra es kenn eldra henn, un nemma di vitt-fraw iahra ox fa en fashprechnis.

⁴Si sheeva selli aus iahra vayk es noht henn, un di oahma im land missa sich fashtekla.

⁵Vi vildi aysla in di vildahnis, gayn di oahma rumm am gukka fa ess-sach. Sell is da vayk es si iahra kinnah feedra.

⁶Si geddahra's foodah im feld, un laysa uf vass ivvahrich is in di gottlohsa iahra vei-goahra.

⁷Si leiya in di nacht unni glaydah, un henn nix fa sich zu dekka im kalda.

⁸Si sinn nass fumm reyyah in di berga; si missa sich an di felsa nohch halda veil si kenn heisah henn.

⁹'S kind es kenn daett hott vatt funn di muddah-brusht vekk grissa, un em oahma sei kind is funn eem gnumma fa en shuld betzawla.

¹⁰Di oahma gayn rumm nakkich, unni glaydah, si drawwa di shayb in di eahn, un doch gayn si hungahrich.

¹¹In di ayl-goahra macha si ayl; un si dredda da vei raus in di vei-press, avvah gayn selvaht dashtich.

¹²Selli es am shtauva sinn yammahra in di shtatt, un di sayla funn selli es vay gedu sinn roofa naus fa hilf, avvah Gott dutt nix diveyya.

¹³'S hott anri es sich geyyich's licht setza, si vissa da vayk fumm licht nett, un bleiva nett in di pawt fumm licht.

¹⁴Da doht-shlayyah shtayt uf meiyets am dawk, eah macht selli doht es oahm un in noht sinn, un nacht's shtayld eah vi en deeb.

¹⁵Es awk fumm aybrechah vatsht vi's dunkel vatt, un sawkt, ‘Nimmand kann mich sayna,’ eah dekt sei ksicht zu.

¹⁶Im dunkla brecha mennah in heisah nei, deich da dawk kumma si nett raus. Si halda sich vekk fumm licht.

¹⁷'S dunkla is vi meiyets zu eena, si feicha sich nett veyyich di veeshta sacha funn di nacht.

¹⁸Si sinn vi shaum ovva uf em vassah, 's land es si aykna is faflucht, un nimmand gayt may zu sei vei-goahra.

¹⁹Vi di hitz un's drukkana es shnay-vassah vekk nemd, so nemd's grawb selli vekk es ksindicht henn.

²⁰Iahra maemm es si gedrawwa hott fagest si; si vadda kfressa bei di veahm un vadda fagessa, ungettlichkeit vatt fabrocha vi en faulah bohm.

²¹Si doon letz zu di unfruchtboah fraw es kenn kinnah hott, un doon nix goodes fa di vitt-fraw.

²²Gott zeekt di mechticha vekk bei sei gvald, eah shtayt uf, avvah nimmand kann shuah sei funn sei layva.

²³Eah lost si layva unni furcht, un si henn roo, avvah eah hald sei awwa uf iahra vayya.

²⁴Si sinn hohch-geaht fa en zeit, no sinn si nimmi datt, si vadda niddah gebrocht un vekk kshmissa vi alli-ebbah shunsht; si vadda abkshnidda vi di kebb funn frucht.

²⁵Vann dess nett so is, kann ennich ebbah miah annahshtah veisa, un mei vadda nix veaht macha?”