Read Pennsylvania German Hiob 26 Bible Online

Hiob 26 - Pennsylvania German bible

Hiob 26

¹No hott da Hiob ksawt,

²“Vee oahrich shtaysht du demm bei es kenn grefta hott! Vee oahrich hosht du demm kolfa es kenn shteikah oahm hott!

³Vee oahrich gebsht du demm roht es kenn veisheit hott! Vass fa vundahboahri eisicht hosht du gvissa!

⁴Veah hott diah kolfa mitt di vadda es du ksawt hosht? Vass fa geisht hott kshvetzt aus dei maul?

⁵Di geishta funn di dohda ziddahra, unnich di vassahra un selli es datt voona.

⁶Es grawb is abgedekt fannich Gott, un's is uf gmacht zu sei awwa.

⁷Eah shtrekt da himmel in di natt naus ivvah's leahra, un henkt di eaht uf nix.

⁸Eah vikkeld di vassahra uf in sei volka, un di volka fareisa nett unnich iahra gvicht.

⁹Eah dekt sei kaynich-shtool zu, bei di volka drivvah du.

¹⁰Eah hott da ring fumm himmel auskshtrekt ivvah da deef say, fa di helling un's dunkla funn-nannah halda.

¹¹Di poshta fumm himmel ziddahra, un fashtauna sich vann eah si zankt.

¹²Deich sei graft hott eah da say shtill gmacht, un bei sei veisheit hott eah's say-diah, Rahab, kshlauwa.

¹³Bei seim vind sinn di himla abgeblohsa un shay vadda, un sei hand hott di shlang doht gmacht es am difunn gay voah.

¹⁴Avvah dess is yusht da ohfang funn sei vayya, miah heahra yusht en pishbah funn eem. Veah kann's gviddah funn sei macht fashtay?”