Read Pennsylvania German Hiob 27 Bible Online

Hiob 27 - Pennsylvania German bible

Hiob 27

¹No hott da Hiob ohkalda shvetza un hott ksawt,

²“So shuah es Gott laybt, deah es mei recht vekk gnumma hott, un da Awlmechtich, deah es mei sayl bedreebt gmacht hott,

³so lang es ich layva habb in miah, un da ohften funn Gott in mei naws is,

⁴dann zayla mei leftz nix unrechtes sawwa un mei zung kenn falshheit sawwa.

⁵Ich zayl selayva nett uf aykna es diah recht sind; biss ich shteahb, zayl ich sawwa es ich unshuldich binn.

⁶Funn mei gerechtichkeit binn ich shuah un gebb's nett uf, mei hatz is nett gedruvveld so lang es ich layb.

⁷Mach mei feinda sei es vi di gottlohsa, un selli es geyyich mich shaffa vi di ungerechta.

⁸Vass fa hofning hott da gottlohs vann eah abkshnidda is, vann Gott sei layva nemd?

⁹Dutt Gott sei roofes heahra, vann angsht ivvah een kumd?

¹⁰Zayld eah frayt havva im Awlmechticha? Zayld eah Gott ohroofa di gans zeit?

¹¹Ich vill eich lanna veyyich Gott sei macht, da vayk fumm Awlmechticha hald ich nett funn eich.

¹²Diah hend dess awl selvaht ksenna, so favass shvetzet diah so dumm?

¹³Dess is da lohn es da gottlohs mensh grikt funn Gott, un di eahbshaft es da unfashtendich mensh grikt fumm Awlmechticha.

¹⁴Even vann eah feel kinnah hott, doch zayla si umkumma bei em shvatt, sei nohch-kummashaft zayld nett satt vadda mitt broht.

¹⁵Selli es ivvahrich sinn vadda in's grawb gebrocht deich peshtelens, un iahra vitt-veivah zayla nett heila.

¹⁶Even vann eah geld zammah sammeld vi da shtawb, un glaydah sammeld vi grund heifa,

¹⁷vass eah zammah sammeld, zayld gvoahra sei bei anri, un di unshuldicha fadayla sei silvah.

¹⁸Eah baut sei haus vi en shpinna-nesht, adda vi en heisli es ebbah drinn bleibt fa's feld vatsha.

¹⁹'S letsht mohl gayt eah in's bett en reichah mann, vann eah sei awwa uf macht is alles fatt.

²⁰Angsht kumd ivvah een vi hohch vassah, en grohsah vind nemd een vekk deich di nacht.

²¹Da east vind haybt een uf un drawkt een vekk, eah nemd een vekk funn seim haus.

²²'S blohst geyyich een unni een davvahra; eah shpringd vekk fumm vind sei macht.

²³Mennah fashpodda een bei iahra hend zammah shlauwa, un peifa ivvah een vo-evvah es eah anna gayt.”