Read Pennsylvania German Hiob 28 Bible Online

Hiob 28 - Pennsylvania German bible

Hiob 28

¹“Es hott bletz vo silvah gegrawva is, un bletz vo gold kshmolsa vatt.

²Eisa vatt aus di eaht gnumma, un kubbah vatt aus di shtay kshmolsa.

³Mennah nemma lichtah in di dunkla bletz; si sucha in di deefshta lechah fa keshtlichi shtay, drunna vo's oahrich dunkel is.

⁴Si grawva lechah veit vekk funn leit, in bletz vo leit iahra fees nett lawfa; si henka un shvinga funn shtrikk, un grawva di shtay raus.

⁵Ovva uf di eaht dutt ess-sach vaxa, avvah unna drunnah vatt alles ivvah-gedrayt es vi mitt feiyah.

⁶Sapphires kumma funn shtay, un da shtawb hott gold drinn.

⁷Da voi in di luft vayst nett vo selli bletz sinn, em awdlah sei awk hott si nett ksenna.

⁸Shtolsi diahra lawfa nett drivvah, un da layb gayt nett datt fabei.

⁹Da mann grawbt da flint-shtay, un drayt da grund ivvah unna an di berga.

¹⁰Eah grawbt lechah deich di felsa, un sei awwa sayna awl's keshtlich sach.

¹¹Eah damd di revvahra uf es si nett lawfa, un vass fashtekkeld is bringd eah raus in's licht.

¹²Avvah vo kann veisheit kfunna sei? Vo kenna miah lanna fa fashtay?

¹³Da mensh fashtayt nett vass veisheit veaht is, un veisheit vatt nett kfunna im land funn di levendicha.

¹⁴'S deefa sawkt, ‘See is nett in miah,’ un da say sawkt, ‘See is nett mitt miah.’

¹⁵See kann nett gekawft sei mitt em beshta gold, un genunk silvah kann nett raus gvohwa sei difoah.

¹⁶See kann nett gekawft sei mitt em gold funn Ophir, adda mitt keshtlich onyx un sapphires.

¹⁷Gold un sheinich glaws kann ma nett fagleicha mitt iahra, un ma kann see nett fahandla fa goldichi sacha.

¹⁸Coral un crystal is nett diveaht shvetza diveyya; veah veisheit grikt, hott may es keshtlichi pearls.

¹⁹Topaz aus em land Kush is di veisheit nett gleich, un see kann nett gekawft sei mitt pyuah gold.

²⁰Dann vo kumd di veisheit bei? Vo kenna miah lanna fa fashtay?

²¹See is fashtekkeld funn di awwa funn alles levendiches, even funn di fekkel in di luft.

²²Di fadeahvung un's grawb sawwa, ‘Unsah oahra henn shund keaht difunn.’

²³Gott fashtayt di veisheit iahra vayk, eah laynich vayst vo see bleibt.

²⁴Eah kann's end funn di eaht sayna, eah saynd alles unnich em himmel.

²⁵Vo eah em vind sei macht gevva hott, un di vassahra raus gmessa hott,

²⁶vo eah ausgmacht hott vo da reyyah falla soll, un en pawt gmacht hott fa da gviddah-shtoahm,

²⁷no hott eah di veisheit ksenna un see ivvah-gegukt, eah hott see eiksetzt un see ausbroviaht.

²⁸Un zumm mensh hott eah ksawt, ‘Gukk moll, di furcht fumm Hah, sell is veisheit, un fa sich vekk halda funn evil, sell is fashtendes.’”