Read Pennsylvania German Hiob 29 Bible Online

Hiob 29 - Pennsylvania German bible

Hiob 29

¹Da Hiob hott no ohkalda shvetza un hott ksawt,

²“Oh, vann ich yusht veah vi ich voah in di fagangana moonada, in di dawwa vo Gott ivvah mich gvatsht hott;

³vi sei licht uf mei kobb ksheind hott, un ich binn deich's dunkla gloffa bei seim licht;

⁴So vi ich voah in di dawwa vo ich noch shteik voah, vo Gott mei freind voah un noch ivvah mei haus voah;

⁵vo da Awlmechtich noch bei miah voah, un mei kinnah noch um mich rumm voahra;

⁶vo mei pawt gvesha voah in millich, un di felsa ayl ausgleaht henn fa mich!

⁷Vo ich naus an's doah funn di shtatt ganga binn, un mei sitz gnumma habb unnich di eldishti,

⁸henn di yunga mennah mich ksenna un sinn nayva anna kshtanna, un di alda mennah sinn ufkshtanna,

⁹di evvahshti henn ufkeaht shvetza, si henn iahra meilah zu kohva mitt iahra hend,

¹⁰di shtimma funn di feddahshta voahra niddah kalda, iahra zunga henn zu iahra gummah kshtokka.

¹¹Veah-evvah es mich keaht hott, hott goot kshvetzt veyyich miah, un selli es mich ksenna henn, henn mich gepreist,

¹²veil ich di oahma frei gmacht habb es groofa henn fa hilf, un selli unni eldra es nimmand katt henn fa eena helfa.

¹³Da mann es am shtauva voah hott mich ksaykend, un ich habb di vitt-fraw iahra hatz froh gmacht.

¹⁴Ich habb gerechtichkeit ohgedu fa mei glaydah, un fa's recht ding du, voah vi en rokk un en kobb-duch zu miah.

¹⁵Ich voah awwa zu di blinda, un fees zu di lohma.

¹⁶Ich voah vi en daett zu selli in noht, un ich habb's sach ausksucht es miah nett bekand voah.

¹⁷Ich habb di zay fabrocha funn di ungerechta, un habb selli es kfanga voahra aus iahra maul grissa.

¹⁸Ich habb als gedenkt ich zayl shtauva in meim ayya haus, un mei dawwa zayla feel sei, vi da sand.

¹⁹Ich habb gedenkt mei vatzel zayld nunnah langa an's vassah vi en bohm, un da dau zayld di gans nacht uf mei nasht sei.

²⁰Ich habb gmaynd mei hallichkeit zayld immah frish bleiva, un da bow in mei hand immah nei.

²¹Mennah henn gvoaht fa mich abheicha, un voahra shtill fa mei roht heahra.

²²Noch demm es ich kshvetzt habb, hott nimmand may kshvetzt, un mei vadda sinn leicht uf si gedrobst.

²³Si henn gvoaht fa mich vi fa reyyah, un henn iahra maul uf gmacht vi fa da free-yoah reyyah.

²⁴Vann si moot faloahra henn, habb ich glacht mitt eena un's licht in meim ksicht hott si gedrohsht.

²⁵Ich voah iahra foah-gengah un habb eena da vayk gvissa; ich voah bei eena vi en kaynich unnich sei greeks-gnechta, vi aynah es selli gedrohsht hott es veina.”