Read Pennsylvania German Hiob 3 Bible Online

Hiob 3 - Pennsylvania German bible

Hiob 3

¹Noch sellem hott da Hiob sei maul uf gmacht un hott da dawk es eah geboahra voah fafluchet.

²Eah hott ksawt,

³“Loss da dawk es ich geboahra voah ausgrivva sei, un di nacht es es ksawt voah, ‘En boo is im muddahs-leib!’

⁴Loss sellah dawk dunkel sei, un loss Gott funn ovva-heah nix drumm gevva diveyya, un loss aw kenn licht druff sheina.

⁵Loss sellah dawk sei mitt dunkles un finshtahnis; loss en volk drivvah kumma; loss da dawk ivvah-kumma sei mitt shvatz dunkles.

⁶Loss heslichi dunkelheit ivvah selli nacht kumma; loss si nett gezayld sei mitt di dawwa fumm yoah; un aw nett mitt di moonada.

⁷Loss selli nacht unfruchtboah sei; un kenn fraylichi yacht keaht sei drinn.

⁸Loss selli es di dawwa faflucha, sellah dawk faflucha; un selli ess kenna, da Leviathan ufvekka.

⁹Loss di meiya-shtanna funn selli nacht dunkel sei; loss si voahra fa da dawk es nett kumma zayld, un aw nett di eahsht helling funn di sunn,

¹⁰veil's mei maemm iahra muddahs-leib nett zu gmacht hott, un mei awwa nett kalda hott funn druvvel sayna.

¹¹Favass binn ich nett kshtauva in mei maemm iahra muddahs-leib, adda an di zeit es ich geboahra voah?

¹²Favass henn di gnee mich ohgnumma, adda di brusht, es ich sukla sett?

¹³Fa no hett ich mich shtill anna glaykt; ich veah am shlohfa un am roowa.

¹⁴Ich veah am shlohfa mitt kaynicha un roht-gevvah, es sich heisah viddah ufgebaut henn es nunnah kfalla voahra.

¹⁵Ich veah am shlohfa mitt roolahs, es iahra heisah kfild henn mitt gold un silvah.

¹⁶Favass voah ich nett fagrawva vi en doht-geboahra kind, vi en kind es es licht fumm dawk nett ksenna hott?

¹⁷Datt doon di ungettlicha shtobba druvvel macha, un selli es matt sinn greeya roo.

¹⁸Datt henn di kfangana fridda, si heahra di shtimm nett funn iahra meishtah.

¹⁹Di grohsa un di glenna sinn datt, da deensht-gnecht is frei funn seim meishtah.

²⁰Favass is licht gevva zu selli es soffahra, un layva gevva zu di bedreebda im hatz,

²¹adda zu selli es voahra fa da doht es nett kumd, zu selli es da doht sucha vi en keshtlich ding,

²²un sinn kfild mitt frayt, un froiya sich vann si's grawb finna?

²³Favass is licht gevva zumm mann es nett vayst vass eem foah is, zumm mann es eigringd is bei Gott?

²⁴Fa in blatz funn essa muss ich hatt shnaufa, mei geyammah lawft raus vi vassah.

²⁵Vass ich kfeicht habb, is uf mich kumma; vass ich angsht katt habb, hott blatz gnumma.

²⁶Ich habb kenn fridda un binn nett shtill; ich habb kenn roo, avvah yusht druvvel.”