Read Pennsylvania German Hiob 30 Bible Online

Hiob 30 - Pennsylvania German bible

Hiob 30

¹“Avvah nau selli es yingah sinn es ich, fashpodda mich; ich hett als iahra feddah fa'acht, un si nett mitt mei shohf-hund gedu.

²Vass goot voahra di grefta funn iahra hend zu miah, siddah es si so shvachi mennah voahra?

³Si voahra dinn un dah funn hungahs-noht, un sinn rumm gloffa im drukka land, in di vildahnis deich di nacht.

⁴Si henn sals-graut ksammeld funn di hekka-putsha, un iahra ess-sach voah di vatzla funn baym.

⁵Si voahra unnich di leit vekk gedrivva; di leit henn gegrisha ivvah si es vann si deeb veahra.

⁶Si henn missa voona in di gracha an di grikka nohch, in di lechah im grund un in di felsa.

⁷Kshvissich di hekka-putsha henn si naus gegrisha, un unnich di dishtla henn si sich fasammeld.

⁸Si sinn gottlohsi leit es kenn nohma henn; si voahra aus em land gedrivva.

⁹Nau fashpodda iahra kinnah mich, un singa shpott-leedah; ich binn yusht en shpott-vatt zu eena.

¹⁰Ich binn grausam zu eena un si halda sich vekk funn miah, un shemma sich nett fa in mei ksicht shpautza.

¹¹Gott hott mei bowstring lohs glost un mich shvach gmacht, fasell braucha si sich nett zrikk hayva fannich miah.

¹²Uf mei rechtsi seit doon si ufgenga geyyich mich, si macha mich hinnahsich gay, un rishta sich fa mich umbringa.

¹³Si shneida mei pawt ab un broviahra mich umbringa, un's is nimmand fa si shtobba.

¹⁴Si kumma an mich vi deich en loch in di vand, ivvah's sach rolla si rei.

¹⁵Ich binn ivvah-kumma un fagelshtaht, mei eah is fatt geblohsa vi bei em vind, un mei hofning fagayt vi en volk.

¹⁶Un nau is es layva funn mei sayl am ausgleaht vadda; di dawwa funn aylend henn mich ivvah-gnumma.

¹⁷Deich di nacht boaht's deich mei gnocha, un di shmatza es an miah fressa, shlohfa nett.

¹⁸Mitt grohsi gvald vadda mei glaydah runslich, dee shmatza henka an miah vi da kallah funn mei rokk.

¹⁹Gott hott mich in da drekk kshmissa, un ich binn vi shtawb un esh.

²⁰Ich roof zu diah, oh Gott, fa hilf, avvah du gebsht mich kenn andvat; ich shtay uf, avvah du guksht yusht an mich.

²¹Du hosht shreklich geyyich mich gedrayt; mitt di macht funn dei hand dusht du mich fafolka.

²²Du haybsht mich uf un dreibsht mich fannich em vind, du shmeisht mich rumm im shtoahm.

²³Fa ich vays es du mich zumm doht bringa zaylsht, an da blatz vo awl di levendicha zammah kumma.

²⁴Dutt nett aynah es nunnah gebrocha is sei hand naus shtrekka, un in sei noht roofa fa hilf?

²⁵Habb ich nett keild ivvah selli es en hatt layva henn? Voah nett mei sayl bedreebt ivvah selli in noht?

²⁶Avvah vo ich koft habb fa goodes sayna, is evil kumma; vo ich gvoaht habb fa helling, is es dunkla kumma.

²⁷Ich binn am innahlich farissa vadda, un's shtobt nett, dawwa funn soffahra sinn fannich miah.

²⁸Ich gay rumm un binn shvatz gmacht, avvah nett bei di sunn; ich shtay uf in di fasamling un roof fa hilf.

²⁹Ich binn en broodah vadda zu di faxa, un en kumrawt zu di ostriches.

³⁰Mei haut drayt shvatz, un mei gnocha brenna mitt feevah.

³¹Mei harf shpeeld yusht fa di bedreebda, un mei flute fa selli es veina.”