Read Pennsylvania German Hiob 31 Bible Online

Hiob 31 - Pennsylvania German bible

Hiob 31

¹“Ich habb en bund gmacht mitt mei awwa, es ich nett an en yung maydel gukk mitt lusht.

²So vass is em Gott funn ovva-heah sei dayl zu miah, adda mei eahbshaft fumm Awlmechticha drovva in di hay?

³Kumma nett shlechti sacha uf di ungerechta, un fadauves uf selli es letz doon?

⁴Dutt eah nett mei vayya sayna, un mei shritt zayla?

⁵Vann ich in falshheit gloffa binn, adda mei foos fafiahres nohch ganga is,

⁶dann loss Gott mich veeya uf en eahlichi vohk; no vayst eah es ich unshuldich binn.

⁷Vann mei shritt fumm vayk gedrayt is, vann mei hatz mei awwa nohch ganga is, adda vann mei hend fadrekt vadda sinn,

⁸dann loss mich sayya un ebbah shunsht's frucht essa, un loss sell es vaxt fa mich aus di vatzel ufgrobt vadda.

⁹Vann deich en veibsmensh mei hatz glusht hott, adda vann ich gvoaht habb an mei nochbah sei deah,

¹⁰dann loss mei fraw mawla fa ebbah shunsht, un loss anri mennah shlohfa mitt iahra.

¹¹Fa sell veah en shand gvest un en sind es gricht sei muss.

¹²Es veah vi en feiyah es alles fabrend, un dayt alles fadauva es ich habb.

¹³Vann ich's recht funn mei gnecht adda mawt fa'acht habb, vann si en glawk geyyich mich gebrocht henn,

¹⁴dann vass kend ich du vann Gott fannich miah shtayt? Vass fa andvat gebb ich eem vann eah mich richt?

¹⁵Hott nett sellah es mich gmacht hott in mei muddahs-leib, mei gnechta aw gmacht? Hott nett Gott uns awl gmacht im muddahs-leib?

¹⁶Vann ich ennich ebbes zrikk kohva habb funn di oahma, un habb di awwa funn di vitt-veivah glost shvach vadda,

¹⁷vann ich mei broht selvaht gessa habb, un nett aw samm gevva habb zumm kind unni eldra,

¹⁸(fumm yungem uf habb ich een ufgezowwa vi sei daett, un ich habb immah acht gevva uf di vitt-veivah.)

¹⁹Vann ich ennich ebbah ksenna habb am shtauva veil eah kenn glaydah katt hott, adda en mann ksenna habb in noht unni ebbes fa sich zu dekka,

²⁰un eah hott mich nett ksaykend fa een voahm macha mitt di vull funn mei shohf,

²¹vann ich mei hand uf kohva habb geyyich selli unni eldra, diveil ich gvist habb es ich eena helfa kann am shtatt-doah,

²²dann loss ebbah mei oahm fabrecha, loss en aus em shuldah grissa sei.

²³Fa ich feich mich veyyich Gott sei shtrohf ivvah mich, un sei hallichkeit dayt mich halda funn so sach du.

²⁴Vann ich mei fadrauwa in gold gedu habb, un zu fei gold ksawt habb, ‘Du bisht mei drohsht,’

²⁵vann ich mich kfroit habb veil ich so reich binn, un veil ich so feel zammah ksammeld habb,

²⁶vann ich an di sunn gegukt habb es am sheina voah, adda da moon am gay in hallichkeit,

²⁷un mei hatz is no ivvah-gnumma mitt demm, un ich habb si geaht mitt en kuss funn mei hand,

²⁸dann veahra awl selli sinda nohtvendich gvest fa gricht sei, fa ich veah nett shtandhaftich gvest zu Gott drovva in di hay.

²⁹Habb ich mich kfroit vann's shlecht ganga is mitt mei feind, adda voah ich froh vann eah druvvel grikt hott?

³⁰Nay, ich habb nee nett mei maul glost sindicha, bei vinsha es en fluch uf een kumd.

³¹Henn di mennah funn mei haus-halding nett ksawt, ‘Veah kann ebbah finna es sich nett ufkfild hott mitt sei flaysh?’

³²Kenn fremdah hott missa nachts draus in di shtrohs shlohfa, fa ich habb mei deah uf gmacht zu leit vekk funn haym.

³³Habb ich mei sinda zu gedekt vi mensha doon, un si fashtekkeld in mei hatz,

³⁴veil ich mich kfeicht habb veyyich di leit, un so en angsht katt habb funn iahra kshvetzah, es ich shtill voah un nett aus em haus ganga binn?

³⁵Oh, vann ich yusht ebbah hett fa mich abheicha! Gukket moll, do is mei nohma uf babiah, loss da Awlmechtich miah andvat gevva, loss sellah es mich pshuldicht's uf babiah shreiva.

³⁶Ich dayt geviss dess uf mei shuldah veahra, ich dayt's even uf mei kobb binna vi en krohn.

³⁷Ich dayt eem sawwa veyyich alli shritt es ich gnumma habb, un vi en roolah dayt ich nuff zu eem gay.

³⁸Dutt mei land geyyich mich rohda, un di blooks-feicha mitt-nannah heila;

³⁹habb ich's frucht gessa unni's betzawla, adda di gnechta glost fahungahra?

⁴⁰Vann ich habb, dann loss di danna uf kumma im blatz funn vaytza, un's veetz im blatz funn geahsht.” Di vadda fumm Hiob shtobba do.