Read Pennsylvania German Hiob 32 Bible Online

Hiob 32 - Pennsylvania German bible

Hiob 32

¹No henn dee drei mennah ufkeaht andvat gevva zumm Hiob, veil eah sich selvaht gerecht kaysa hott.

²Avvah da Elihu is vundahboah bays vadda ivvah da Hiob, veil eah sich gerecht kohva hott un nett Gott. Da Elihu voah em Baracheel funn Bus sei boo es fumm kshlecht Ram voah.

³Eah voah aw bays ivvah di drei freind veil si kenn goodah andvat kfunna henn fa da Hiob, avvah henn een doch fadamd.

⁴Da Elihu hott gvoaht fa shvetza zumm Hiob veil si eldah voahra es eah.

⁵Vo eah ksenna hott es di drei mennah nix may katt henn zu sawwa, hott sei zann hays gebrend.

⁶So hott da Elihu, em Baracheel funn Bus sei boo, ksawt, “Ich binn yung in yoahra, un diah sind ald; fasell habb ich mich kfeicht eich sawwa vass ich denk.

⁷Ich habb gmaynd di eldra sedda shvetza, diah es hohch sind in yoahra seddet veisheit veisa.

⁸Avvah's is da geisht im mensh, un da ohften fumm Awlmechticha es em mensh fashtand gebt.

⁹'Sis nett yusht di alda es veisheit henn, adda di alda es vissa vass recht is.

¹⁰So nau vill ich havva es diah mich abheichet, losset mich sawwa vass ich denk.

¹¹Ich habb gvoaht diveil es diah kshvetzt hend, ich habb abkeicht zu vass diah gmaynd hend, diveil es diah ksucht hend vi's zu sawwa.

¹²Ich habb eich goot abkeicht, avvah kens funn eich hott gvissa es da Hiob letz voah, diah hend kenn andvat katt fa sei vadda.

¹³Sawwet nett, ‘Miah henn veisheit kfunna; Gott muss eem andvat gevva, nett da mensh.’

¹⁴Da Hiob hott sei vadda nett kshvetzt geyyich mich, un ich gebb eem nett andvat vi diah hend.

¹⁵Si sinn engshtlich, un henn nix may zu sawwa, iahra vadda voahra kenn andvat zu eem.

¹⁶Soll ich voahra, veil si nimmi shvetza, veil si shtobba un kenn andvat henn?

¹⁷Ich zayl aw sawwa vass ich mayn, ich zayl aw mei andvat gevva.

¹⁸Ich binn foll vadda, da geisht in miah macht mich shvetza.

¹⁹Innahlich binn ich vi en vei-boddel mitt en shtobbah, vi en leddah vei-sakk yusht ball am ufblohsa.

²⁰Ich muss shvetza un ablawda, ich muss mei leftz uf macha un andvat gevva.

²¹Ich zayl kenn seit nemma in demm, un ich zayl kenn mensh ohshmaychla.

²²Ich vays nett vi zu ohshmaychla, adda dann dayt mei Sheffah mich vekk nemma.”