Read Pennsylvania German Hiob 33 Bible Online

Hiob 33 - Pennsylvania German bible

Hiob 33

¹“Avvah nau, Hiob, heich mei vadda ab, un gebb acht zu vass ich sawk.

²Ich mach mei maul uf, un di zung shvetzt aus meim maul.

³Mei vadda kumma aus en ufrichtich hatz, un mei leftz shvetza eahnshtlich vass ich vays.

⁴Da Geisht Gottes hott mich gmacht, un da ohften fumm Awlmechticha gebt miah layva.

⁵Gebb miah andvat vann du kansht, risht dich fa geyyich mich shtay.

⁶Ich binn grawt vi du fannich Gott, un ich binn aw aus eaht gmacht.

⁷Du brauchsht dich nett feicha veyyich miah, un mei hand is nett shveah uf dich.

⁸Du hosht ksawt fannich mei oahra, ich habb dich keaht dee vadda sawwa:

⁹‘Ich binn rein un habb nix letzes gedu; ich binn unshuldich un habb kenn sinda.

¹⁰Avvah doch hott Gott faylah kfunna mitt miah, eah nemd mich fa sei feind.

¹¹Eah bind mei fees mitt kedda, un vatsht awl mei pawda.’

¹²Avvah loss mich diah sawwa, du bisht nett recht in demm, veil Gott graysah is es da mensh.

¹³Favass faglawksht du dich zu eem, un sawksht, ‘Eah gebt kenn andvat zu mei vadda’?

¹⁴Gott dutt shvetza, aymol ay vayk, un's neksht mohl da annah, avvah da mensh heaht's nett.

¹⁵In en drohm, nachts in en vision, vann leit eishlohfa in en deefah shlohf, diveil es si in iahra bett leiya,

¹⁶dann shvetzt eah in iahra oahra, un fagelshtaht si mitt vanninga.

¹⁷Eah dutt dess so es eah da mensh drayya kann funn letz du, un een halda funn shtols sei,

¹⁸un so es eah sei sayl aus em grawb halda kann, un sei layva halda funn doht gmacht sei mitt em shvatt.

¹⁹Da mensh is aw kshtrohft mitt shmatza uf seim bett, un feevah macht sei gnocha di gans zeit shidla,

²⁰so es eah vatt es ess-sach eem ayklich is un sei sayl's besht ess-sach nunnah drayt.

²¹Sei flaysh fazeaht vekk zu nix, un sei gnocha es ma nett sayna hott kenna, shtekka nau raus.

²²Sei sayl kumd nayksht an's grawb un sei layva nayksht zu selli es da doht bringa.

²³Doch, es mecht en engel uf sei seit sei, en middel-mann, aynah funn Gott sei dausends, fa em mensh sawwa vass recht is fa een.

²⁴Loss da engel no gnaydich sei zu eem un sawwa, ‘Hald een funn nunnah in's grawb gay, fa ich habb en vayk kfunna fa een frei setza.’

²⁵No vatt sei flaysh viddah frish vi ma kind sein, un eah vatt viddah yung.

²⁶Eah zayld zu Gott bayda, un Gott is gnaydich zu eem; eah saynd Gott sei ksicht un is fraylich, un Gott gebt eem sei gerechtichkeit zrikk.

²⁷Eah singd fannich leit un sawkt, ‘Ich habb ksindicht, un habb gedu vass nett recht is, avvah ich habb nett grikt vass ich fadeend habb.

²⁸Eah hott mei sayl frei-kshteld funn nunnah in's grawb gay, mei layva zayld's licht sayna.’

²⁹Gott dutt awl dee sacha zvay adda drei mohl zumm mensh,

³⁰so es eah sei sayl zrikk drayya kann fumm grawb, un so es eah's licht funn layva sayna kann.

³¹Gebb acht zu vass ich sawk, Hiob, sei shtill, un loss mich shvetza.

³²Vann du ebbes zu sawwa hosht, dann gebb miah andvat, shvetz, ich vill diah geahn dei recht gevva.

³³Avvah vann nett, dann heich mich ab, sei shtill, un ich lann diah veisheit.”