Read Pennsylvania German Hiob 34 Bible Online

Hiob 34 - Pennsylvania German bible

Hiob 34

¹Da Elihu hott ohkalda un ksawt,

²“Heichet mei vadda ab, diah mennah mitt veisheit, heichet mich ab, diah mennah es alles visset.

³Fa's oah broviaht vadda aus, so vi di zung ess-sach broviaht.

⁴Losset uns selvaht ausmacha vass recht is, losset uns mitt-nannah lanna vass goot is.

⁵Da Hiob sawkt, ‘Ich binn gerecht, avvah Gott hott mei recht vekk gnumma.

⁶Even vann ich recht binn, doch binn ich fanumma fa am leeya sei; even vann ich unshuldich binn, doch binn ich zumm doht vay gedu.’

⁷Vass fa mann is vi da Hiob, deah es fashpott vatt un eah drinkt's vi vassah?

⁸Eah hald sich uf mitt evil-shaffah, un lawft mitt gottlohsi leit.

⁹Fa eah sawkt, ‘Es helft em mensh nix vann eah broviaht kfellich sei zu Gott.’

¹⁰So heichet mich ab, diah mennah es alles fashtaynd, Gott dayt selayva nett droh denka fa evil du, adda da Awlmechtich fa letz du.

¹¹Eah betzawld da mensh fa sell es eah fadeend hott, un bringd uf een vass zu eem heaht.

¹²Unni zveifla, Gott dayt selayva nett letz du, da Awlmechtich beekt nee nett vass recht is.

¹³Veah hott eem graft gevva ivvah di eaht? Veah hott een ivvah di gans veld gedu?

¹⁴Vann eah so du vett, un dayt sei Geisht un ohften vekk nemma,

¹⁵dann dayt awl flaysh mitt-nannah fagay, un da mensh dayt zrikk zu shtawb drayya.

¹⁶Vann du fashtand hosht, dann heah dess, heich ab vass ich zu sawwa habb.

¹⁷Kann sellah es hast vass recht is, roola? Fadamsht du sellah es gerecht un mechtich is?

¹⁸Is dess nett sellah es zumm kaynich sawkt, ‘Du bisht nix veaht,’ un zu di feddahshta, ‘Diah gottlohsi,’

¹⁹deah es nett ayseidich is zu evvahshti, un es nett unnahshidlich is zu di reicha ivvah di oahma? Sinn si nett awl di eahvet funn sei hend?

²⁰Leit shteahva bletzlich; in di mitt funn di nacht vadda si kshiddeld un shteahva, di mechtichi vadda vekk gnumma unni deich mensha hend.

²¹Sei awwa sinn uf di vayya funn mensha; eah saynd alli shritt es si macha.

²²Es is kenn dunklah blatz adda shadda, vo evil-shaffah sich fashtekla kenna.

²³Gott brauch di mensha nett veidah ausbroviahra, fa si richta fannich sich selvaht.

²⁴Gott bringd di mechticha um unni si unnah-sucha, un setzt anri uf in iahra blatz.

²⁵Veil eah iahra verka alles vayst, dann shtatzt eah si deich di nacht, so es si gans nunnah gedredda vadda.

²⁶Eah shtrohft si fa iahra gottlohs layva, vo alli-ebbah's sayna kann,

²⁷veil si vekk gedrayt sinn funn eem nohch gay, un henn awl sei vayya fa'acht.

²⁸Deich si henn di oahma missa zu eem roofa fa hilf, un eah hott selli keaht es in noht voahra.

²⁹Avvah vann eah shtill bleibt, veah kann een fadamma? Vann eah sei ksicht fashtekkeld, veah kann een sayna? Doch is eah ivvah da mensh un ivvah di heida,

³⁰so es gottlohsi mennah nett ivvah-nemma, un en fall shtella fa di leit.

³¹Hott ebbah zu Gott ksawt, ‘Ich binn shuldich, ich zayl nimmi letz du?

³²Lann mich vass ich nett sayna kann; vann ich letz gedu habb, dann zayl ich's nimmi du.’

³³Siddah es du nunnah draysht vass Gott dutt, denksht du Gott sett nett so ebbah shtrohfa? 'Sis uf zu diah, nett zu miah, so sawk miah vass du vaysht.

³⁴Fashtendichi leit sawwa zu miah, un en mann mitt veisheit es mich heaht, sawkt,

³⁵‘Da Hiob shvetzt unni sacha fashtay, sei vadda sinn unni veisheit.’

³⁶Ich vott da Hiob veah ausbroviaht biss an's end, veil eah andvat gebt vi gottlohsi mennah.

³⁷Zu sei sinda dutt eah sich noch shteibahra; eah macht shpott unnich uns, un sawkt feel vadda geyyich Gott.”