Read Pennsylvania German Hiob 35 Bible Online

Hiob 35 - Pennsylvania German bible

Hiob 35

¹Da Elihu hott no veidah ksawt,

²“Nemsht du dess fa recht sei, vann du sawksht, ‘Ich binn may gerecht es Gott?’

³Du sawksht, ‘Vass goot dutt's miah; vi binn ich bessah ab bei nett sindicha?’

⁴Ich gebb andvat zu diah, un aw zu dei freind do mitt diah.

⁵Gukk moll nuff in da himmel un sayn; gukk moll an di volka hohch ovvich diah.

⁶Vann du sindichsht, vi dutt sell eem shawda? Vann dei sinda feel sinn, vass dutt sell zu eem?

⁷Vann du gerecht bisht, vass gebsht du zu eem, adda vass grikt eah funn dei hand?

⁸Dei ungerechtichkeit kann yusht ebbes du zu mensha vi du, un dei gerechtichkeit zu di mensha-kinnah.

⁹Veil leit oahrich nunnah gedredda sinn, doon si naus roofa, si roofa fa abglawda sei fumm oahm funn di mechticha.

¹⁰Avvah nimmand sawkt, ‘Vo is Gott, deah es mich gmacht hott, deah es lohb-leedah gebt in di nacht,

¹¹deah es uns may land es di diahra uf di eaht, un gebt uns may veisheit es di fekkel im himmel?’

¹²Eah gebt kenn andvat vann leit roofa zu eem, deich da hohchmoot funn di gottlohsa.

¹³Es dutt si kenn goot fa roofa, veil Gott si nett abheicht, un da Awlmechtich fa'acht si.

¹⁴Vee feel vennichah, dann, dutt eah dich abheicha vann du sawksht du saynsht een nett, es du bisht am voahra fa sei gericht, un musht voahra uf een?

¹⁵Un nau, veil Gott in seim zann nett kshtrohft hott, un sich nett oahrich bekimmaht hott veyyich ungerechtichkeit,

¹⁶dann dutt da Hiob sei maul uf macha mitt leahri vadda; eah hald oh shvetza un vayst nix.”