Read Pennsylvania German Hiob 36 Bible Online

Hiob 36 - Pennsylvania German bible

Hiob 36

¹Da Elihu hott veidah ksawt,

²“Heah mich noch bissel lengah ab, no veis ich diah, es noch may ksawt sei kann fa Gott.

³Ich grikk vass ich vays funn veit ab, un ich zayl veisa es mei Sheffah gerecht is.

⁴Du solsht vissa es mei vadda nett falsh sinn; aynah es alles fashtayt is bei diah.

⁵Gott is mechtich avvah eah fa'acht nimmand, eah is mechtich in vass eah fashtayt.

⁶Eah hald di gottlohsa nett levendich, avvah eah gebt di aylendicha iahra recht.

⁷Eah nemd sei awwa nett ab funn di gerechta; eah hokt si uf kaynich-shteel mitt kaynicha, un gebt eena ayvichi eah.

⁸Avvah vann si gebunna sinn mitt kedda, un kfanga sinn mitt di shtrikk funn di aylendicha,

⁹no sawkt eah eena vass si gedu henn, es si ksindicht henn mitt shtolsheit.

¹⁰Eah macht si abheicha zu sei vanning, un sawkt eena es si sich vekk funn evil drayya sella.

¹¹Vann si een abheicha un een deena, dann layva si's ivvahrich funn iahra layva unni noht, un iahra yoahra in blesiah.

¹²Avvah vann si nett heicha, dann kumma si um mitt em shvatt, un shtauva unni ebbes fashtay.

¹³Avvah di gottlohsa im hatz henn innahlichah zann, si frohwa nett fa hilf vann eah si bind.

¹⁴Si shtauva yung, un layva unnich di huahra im tempel.

¹⁵Eah setzt di aylendicha frei funn iahra aylend, un shvetzt zu eena in iahra dreebsawl.

¹⁶Eah lokt dich aus em maul funn dreebsawl, zu en grohsah blatz vo nimmand dich zrikk haybt, un vo dei dish grisht is mitt goot ess-sach.

¹⁷Nau bisht du am gricht vadda mitt em gericht es zu di gottlohsa heaht, un du kansht nett vekk fumm shtrohf es eah diah gebt.

¹⁸Loss nett zann dich vekk lokka fa reich vadda, un dray nett vekk bei geld nemma hinna rumm.

¹⁹Dayt dei geld adda dei gvald dich halda funn angsht havva?

²⁰Hayb nett en falanga fa di nacht, vann leit vekk gnumma vadda funn iahra shtett.

²¹Gebb acht es du dich nett ivvah-draysht zumm evila, dess es du leevah hetsht es aylend.

²²Gukk moll, Gott is hohch uf kohva in sei graft; vo is en leahrah vi eah is?

²³Veah hott eem ksawt vass zu du, adda ksawt zu eem, ‘Du hosht letz gedu’?

²⁴Fagess nett fa sei eahvet preisa, funn demm es leit singa diveyya.

²⁵Awl di mensha henn dess ksenna, leit sayna's funn veit ab.

²⁶Gukk moll, Gott is grohs, un miah doon een nett kenna, miah kenna nett zayla vi ald es eah is.

²⁷Eah zeekt di vassah drobba nuff, un drayt da nevvel zu reyyah.

²⁸Di volka leahra vassah runnah, un's fald runnah uf di mensha.

²⁹Veah kann fashtay vi eah di volka ausnannah dutt, adda vi's gviddah yacht macht im himmel vo Gott bleibt.

³⁰Gukk moll vi eah's gviddah ausnannah shikt es um een rumm is, un dekt da deef say zu.

³¹Sell is vi eah di leit richta dutt, un gebt eena feel ess-sach.

³²Eah nemd's gviddah in sei hend, un hayst's fa gay un sei meik dreffa.

³³Di yacht fumm gviddah gebt en vanning fumm shtoahm, even's fee vayst vass am kumma is.”