Read Pennsylvania German Hiob 37 Bible Online

Hiob 37 - Pennsylvania German bible

Hiob 37

¹“Da shtoahm macht mei hatz globba, un's tshumbt innahlich rumm.

²Heichet goot ab zumm gedimmel funn sei shtimm, un's gebrumm es aus seim maul kumd.

³Eah macht's gviddah unnich em himmel lohs, un shikt's zu's end funn di veld.

⁴Noch sellem kumd di yacht funn sei shtimm, eah dimmeld mitt en mechtichi shtimm. Vann sei shtimm keaht is, dann haybt eah nix zrikk.

⁵Gott sei shtimm dimmeld in vundahboahri vayya, eah dutt grohsi sacha es miah nett fashtay kenna.

⁶Eah sawkt zumm shnay, ‘Fall uf di eaht,’ un zumm reyyah, ‘Leah shteik aus.’

⁷Eah shtobt di eahvet funn alli mann sei hand, so es alli-ebbah vissa kann vi eah shaft.

⁸Di vilda diahra gayn nei, si bleiva in iahra lechah.

⁹Funn di saut kumd da shtoahm, un funn di natt da kald vind.

¹⁰Gott sei ohften macht ice, un di grohsa vassahra vadda kfroahra.

¹¹Eah macht di volka shveah mitt vassah, un aus di volka shikt eah gviddah.

¹²Eah macht di volka sich rumm drayya, ivvahrawlich ivvah di gans eaht; si doon vass-evvah es eah havva vill.

¹³Eah shikt reyyah fa di eaht vessahra, eah mecht's shikka fa leit shtrohfa, adda fa sei shtandhaftichi-leevi veisa.

¹⁴Nau heich moll, Hiob, shtobb un denk ivvah di vundahboahri sacha funn Gott.

¹⁵Vaysht du vi Gott di volka macht eem heicha, un's gviddah macht blitza aus di volka?

¹⁶Vaysht du vi di volka sich ausnannah shtroiya, di verka funn demm es alles fashtayt?

¹⁷Du es hays bisht in dei glaydah, vann's land shtill is veil da vind funn di saut is,

¹⁸kansht du eem helfa da himmel ausshtrekka, un en so hatt macha es en gegossanah shpikkel.

¹⁹Sawk uns vass miah sawwa sedda zu eem, miah sinn im dunkla un vissa nix.

²⁰Sett's eem ksawt sei es ich shvetza vill? Veah ennich ebbah so dumm es eah ufkshlukt sei vett?

²¹Nimmand kann in's licht gukka, es is zu hell im himmel, vann da vind di volka vekk geblohsa hott.

²²Aus di natt kumd en goldichah shein, Gott is geglayt mitt en shreklichi hallichkeit.

²³Da Awlmechtich kenna miah nett finna, eah is zu mechtich mitt graft. Sei gerechtichkeit un gericht dutt eah nett beeya.

²⁴Fasell doon leit een firchta, un eah fa'acht selli es mayna si henn veisheit.”