Read Pennsylvania German Hiob 38 Bible Online

Hiob 38 - Pennsylvania German bible

Hiob 38

¹No hott da HAH andvat gevva zumm Hiob aus em shtoahm. Eah hott ksawt:

²“Veah is dess es mei roht fadunkeld mitt vadda, mitt vadda es kenn fashtand drinn henn?

³Shtay uf un risht dich vi en mann; ich zayl dich sacha frohwa, un du gebsht miah andvat.

⁴Vo voahsht du vo ich di foundation glaykt habb fa di eaht? Sawk miah's, vann du so feel vaysht.

⁵Veah hott ausgmacht vi grohs es di eaht sei soll? Veah hott si gmessa mitt en shnuah? Du setsht dess geviss vissa!

⁶Uf vass voah da fuddah ksetzt? Adda veah hott da ekk-shtay glaykt,

⁷diveil es di meiya-shtanna mitt-nannah ksunga henn, un awl di kinnah Gottes gegrisha henn mitt frayt?

⁸Veah hott da say eikshlossa hinnich doahra, vo eah raus gebrocha is es vi aus en muddahs-leib,

⁹vo ich di volka gmacht habb fa sei glaydah sei, un en eigvikkeld habb mitt dunkelheit vi mitt vindla,

¹⁰vo ich een zrikk kshpatt habb bei doahra ufsetza mitt rikkel,

¹¹un vo ich ksawt habb, ‘So veit daufsht du kumma un nett veidah; do is vo dei shtolsi vella shtobba zayla’?

¹²In dei zeit, hosht du selayva em meiya ksawt vass zu du, adda da dawk gmacht ohfanga?

¹³Hosht du da dawk gmacht di ekkah funn di eaht nemma, un di gottlohsa raus shidla?

¹⁴Vi's dawk vatt, fa'ennaht's di eaht vi vayyichah clay es gedrukt vatt bei en seal nei drikka, di hivla shtayn raus vi runsla in glaydah.

¹⁵Di gottlohsa greeya iahra lichtah vekk gnumma, un iahra ufkohvanah oahm is fabrocha.

¹⁶Bisht du in di vassah-shpringa fumm say ganga, adda uf em bodda fumm say gloffa?

¹⁷Voahra di doahra fumm doht gvissa zu diah; hosht du di doahra ksenna fumm deef dunkla?

¹⁸Hosht du fashtanna vi brayt es di eaht is? Sawk miah's, vann du awl dess vaysht.

¹⁹Vels is da vayk zu di helling iahra haymet? Vo voond's dunkla?

²⁰Kansht du si an iahra blatz nemma? Vaysht du da vayk zu iahra heisah?

²¹Yau, du musht dess geviss vissa, veil du no shund geboahra voahsht! Du hosht shund so feel yoahra glaybt!

²²Bisht du in di shtoah-heisah ganga es da shnay haybt; hosht du di shtoah-heisah ksenna es di shlohsa drinn sinn,

²³selli es ich zrikk hayb fa di zeit funn druvvel, fa di zeit funn shtreit un greek?

²⁴Vo is da blatz es di helling sich fadayld, un vo da east vind sich ausnannah blohst ivvah di eaht?

²⁵Veah hott en blatz gegrawva fa's hohch reyyah-vassah deich lawfa, adda en pawt gmacht fa's gviddah deich gay,

²⁶fa reyya uf's land bringa vo nimmand voond, in di vildahnis vo kenn mensh is,

²⁷fa's drukka un dashtich land vessahra, so es graws vaxa kann?

²⁸Hott da reyya en daett? Veah is da daett fumm dau meiyets?

²⁹Aus vemm sei muddahs-leib kumd's ice, adda da reifa fumm himmel,

³⁰vann's vassah so hatt vatt es en shtay, un da deef say kfriaht ovva druff?

³¹Kansht du di sivva shtanna funn Pleiades zammah binna, adda da shtrikk fumm Orion lohs macha?

³²Kansht du di shtanna macha raus kumma an di recht zeit, adda da Beah fiahra im himmel mitt sei yungi?

³³Vaysht du di adnunga funn di himla; kansht du selli adnunga ufsetza ivvah di eaht?

³⁴Kansht du dei shtimm uf hayva zu di volka, un si macha dich zu dekka mitt reyyah.

³⁵Kansht du di gviddah shtraycha naus shikka so es si gayn un sawwa zu diah, ‘Do sinn miah’?

³⁶Veah gebt veisheit in's hatz, adda veah dutt fashtand in di gedanka?

³⁷Veah hott genunk veisheit fa di volka zayla; veah kann di vassah-ksharra fumm himmel ausleahra,

³⁸vann da shtawb hatt vatt, un di sholla zammah shtekka?

³⁹Kansht du em layb sei flaysh hunda fa een, un di yunga layva satt macha,

⁴⁰vann si in iahra lechah leiya, adda vann si am voahra sinn im hohcha veetz?

⁴¹Veah bringd ess-sach zu di grabb, vann iahra yungi zu Gott roofa, un rumm fleeya unni ebbes zu essa?”