Read Pennsylvania German Hiob 39 Bible Online

Hiob 39 - Pennsylvania German bible

Hiob 39

¹“Vaysht du vann di vilda gays yungi greeya? Hosht du di glenna hash ksenna geboahra vadda?

²Kansht du di moonada zayla es si di yunga drawwa? Vaysht du di zeit vann si geboahra vadda?

³Si bikka sich nunnah, bringa di yunga raus, un sinn no di shmatza lohs.

⁴Di yunga vadda shteik un vaxa uf draus im uffena, si falossa un kumma nimmi zrikk zu eena.

⁵Veah hott da vild aysel frei gay glost, veah hott'n lohs gmacht un en gay glost?

⁶Ich habb eem di vildahnis gevva fa sei haymet, un's salsich land fa drinn voona.

⁷Eah lacht ivvah di vatshaft in di shtatt, un heaht's gegreish nett funn demm vo foaht.

⁸Eah gayt ivvah di hivla fa sei vayt, un sucht fa alli gree ding.

⁹Is da vild ox villing fa shaffa fa dich? Bleibt eah bei deim foodah-drohk ivvah-nacht?

¹⁰Kansht du een macha in di blooks-feich bleiva mitt en shtrikk? Kansht du een macha di ayk zeeya vann du een fiahsht?

¹¹Kansht du dich falossa uf een veil eah shteik is? Losht du dei shveahri eahvet fa een?

¹²Kansht du eem drauwa fa dei frucht rei bringa, un see zammah geddahra uf em dresha-floah?

¹³Da ostrich is fraylich un flapped sei flikkel, avvah sei flikkel sinn nix vi di feddahra fumm stork.

¹⁴See laykt iahra oiyah uf da bodda, un lost da grund si veahma.

¹⁵See fagest es en foos di oiyah fabrecha kann, adda es en vild diah si fadredda kann.

¹⁶See is veesht zu iahra yungi, es vann si nett iahri veahra, un see gebt nix drumm es iahra eahvet fa nix voah.

¹⁷Fa Gott hott iahra di veisheit vekk gnumma un hott iahra kenn goodah fashtand gevva.

¹⁸Avvah vann see sich risht fa shpringa, dann lacht see ivvah da gaul un sei reidah.

¹⁹Kansht du em gaul sei grefta gevva, adda sei hals glaydah mitt en mohna?

²⁰Kansht du een tshumba macha vi en hoi-shrekk? Eah blohst aus di naws un fagelshtaht leit.

²¹Eah shtambt eahnshtlich uf da bodda un froit sich ivvah sei graft. Eah shpringd fassich un gayt geyyich di feinda mitt iahra greeks-ksha.

²²Eah lacht an furcht un feicht sich nett; eah drayt nett zrikk veyyich em shvatt.

²³Uf eem rabbeld da arrow-sakk, un di grohs un glay shpiah glitzahra.

²⁴Eah is eifahrich un ziddaht, un fleekt ivvah da grund; eah kann sich nett shtill hayva vann's blohs-hann blohst.

²⁵Eah blohst aus di naws vann eah's blohs-hann heaht, un shmakt di fecht eb eah nayksht kumd, veil eah di yacht heaht funn di foah-gengah am greisha.

²⁶Is es deich dei veisheit es da voi fleekt, un shtrekt sei flikkel geyyich di saut?

²⁷Haysht du da awdlah fa hohch fleeya, un sei nesht bauwa drovva in di hay?

²⁸Eah voond drovva uf en felsa-vand, un macht sei haymet unnich di shpitzicha felsa.

²⁹Funn datt vatsht eah fa sei ess-sach, un sei awwa sayna's funn veit ab.

³⁰Sei yungi saufa's bloot un vo ebbes dohdes is, datt is eah.”