Read Pennsylvania German Hiob 4 Bible Online

Hiob 4 - Pennsylvania German bible

Hiob 4

¹No hott da Eliphas funn Theman ksawt,

²“Vann ebbah en vatt havva vill mitt diah, nemsht du's geahn oh? Doch veah kann shtill sei un nett shvetza?

³Du hosht feel leit gland, un hosht shvachi hend shteik gmacht.

⁴Dei vadda henn selli ufkohva es kshtolbaht henn; du hosht selli mitt shvachi gnee shteik gmacht.

⁵Avvah nau is druvvel zu diah kumma, un du hosht moot faloahra, 's hott dich gedroffa, un du hosht angsht.

⁶Sett nett dei Gottes-furcht dich shteik psunna macha, un dei unshuldichi vayya diah hofning gevva.

⁷Denk moll droh, veah is selayva umkumma es unshuldich voah? Adda vo is en gerechtah mann doht gmacht vadda?

⁸Dess havvich shund ksenna, selli es ungerechtichkeit bloowa, un selli es druvvel sayya, doon's aw eahnda.

⁹Bei Gott sei ohften kumma si um, un bei da vind funn sei zann kumma si an's end.

¹⁰Da layb roaht un gnatt, un di zay funn di yunga layva sinn abgebrocha.

¹¹Unni diahra es eah doht macha kann, gayt da layb doht, un di layb-muddah iahra glenni vadda ausnannah kshtroit.

¹²Nau en vatt voah hinna rumm gebrocht zu miah; mei oahra henn en pishbah keaht difunn.

¹³Deich engshtlichi drohma in di nacht, vann deefah shlohf uf leit fald,

¹⁴is furcht un ziddahres ivvah mich kumma un hott mei gnocha gmacht shidla.

¹⁵En geisht is an mei ksicht fabei ganga; di hoah uf meim leib henn sich ufkshteld.

¹⁶Es hott kshtobt, avvah ich habb nett gvist vass es voah. En gleichnis hott fannich mei awwa kshtanna, un ich habb en gansi niddahri shtimm keaht:

¹⁷‘Kann en mensh may gerecht sei es Gott? Kann en mann may rein sei es deah vo een gmacht hott?

¹⁸Vann Gott kenn fadrauwa in sei gnechta dutt, un pshuldicht sei engel fa letz du,

¹⁹vi feel may dutt eah's zu selli es gmacht sinn funn di eaht, zu selli es gegrund sinn im shtawb, un es kshvindah fadrikt sinn es en shawb!

²⁰Kshvissich meiyets un ohvets kenna si in shtikkah fabrocha sei, si shtauva ayvichlich, un nimmand nemd's acht.

²¹Di shtrikk funn iahra tents vadda ruff gezowwa; un si shtauva unni veisheit.’”