Read Pennsylvania German Hiob 40 Bible Online

Hiob 40 - Pennsylvania German bible

Hiob 40

¹Da HAH hott no ksawt zumm Hiob:

²“Zayld sellah es eiyaht mitt em Awlmechticha, een recht setza? Loss sellah es Gott pshuldicht eem andvat gevva!”

³No hott da Hiob andvat gevva zumm HAH un hott ksawt:

⁴“Ich binn's nett veaht, vi kann ich diah andvat gevva? Ich du mei hand ivvah mei maul.

⁵Ich habb aymol kshvetzt, avvah ich kann dich nett andvadda; zvay moll, avvah ich sawk nimmi may.”

⁶No hott da HAH kshvetzt zumm Hiob aus em shtoahm:

⁷“Shtay uf un risht dich vi en mann; ich zayl dich sacha frohwa, un du gebsht miah andvat.

⁸Zaylsht du veiklich mei gericht zu nix macha? Daytsht du mich fadamma yusht so es du gerecht bisht?

⁹Hosht du en oahm vi Gott, un hosht du en shtimm es dimmeld vi seini?

¹⁰Du dich oh mitt grohsi eah un glitz, glayt dich mitt hallichkeit un kaynich-eah.

¹¹Leah dei haysah zann aus; gukk an di hohchmeedicha un mach si daymeedich.

¹²Yau, gukk an di shtolsa un faniddah si, drett di gottlohsa nunnah vo si shtayn.

¹³Fagrawb si awl zammah im shtawb, bind si im blatz vo di dohda sinn.

¹⁴No binn ich da eahsht fa bekenna es dei rechtsi hand diah helfa kann.

¹⁵Gukk moll's diah da behemoth, deah es ich gmacht habb vo ich dich gmacht habb. Eah frest graws vi en ox.

¹⁶Gukk moll di grefta in seim leib, un di macht un graft in seim bauch.

¹⁷Sei shvans shtekt nuff vi en cedar-bohm, di flexa in sei hifta sinn zammah kflochta.

¹⁸Sei gnocha sinn vi shteiki shtikkah bronze, un sei bay vi eisichi rooda.

¹⁹Eah is da eahsht funn Gott sei verka, avvah deah es een gmacht hott kann een zrikk hayva mitt sei shvatt.

²⁰Di hivla gevva eem sei ess-sach, un awl di vilda diahra shpeela datt.

²¹Eah laykt sich anna unnich di lotus blansa, un fashtekkeld sich unnich di hohcha shtengel am vassah nohch.

²²Lotus blansa dekka een zu mitt shadda, un di bablah-baym an di grikk noch sinn um een rumm.

²³Eah feicht sich nett vann da revvah ivvah-lawft, un is unbekimmaht vann da Jordan nuff an sei maul kumd.

²⁴Kann ennich ebbah een fanga bei sei awwa blind macha, adda mitt en fall es sei naws deich shtecht?”