Read Pennsylvania German Hiob 41 Bible Online

Hiob 41 - Pennsylvania German bible

Hiob 41

¹“Kansht du da Leviathan fanga mitt en fish-hohka? Adda kansht du sei zung binna mitt en shtrikk?

²Kansht du en shtrikk deich sei naws du, adda sei bakka deich shtecha mitt en hohka?

³Hald eah oh dich frohwa fa bamhatzichkeit? Shvetzt eah zu diah mitt leichti vadda?

⁴Zayld eah en bund macha mitt diah, un fashprecha fa dei gnecht sei fa'immah?

⁵Kansht du shpeela mitt eem vi mitt en fokkel, adda een ohbinna so es dei mawda's vatsha kenna?

⁶Zayla di kawf-leit beeda fa een kawfa, un een uf shneida fa een fadayla unnich nannah?

⁷Kansht du sei haut foll shpiah's macha, un sei kobb foll fish-hohka?

⁸Vann du dei hand uf een layksht, dann fagesht du sei geshtravvel nett kshvind, un dusht's aw nett viddah.

⁹Ennichi hofning fa een fanga is gans letz; even yusht fa een sayna macht em sich anna hokka.

¹⁰Nimmand is so rawsich es eah een ufriahra dauf. Vann dess so is, vi kann ennich ebbah fannich miah shtay?

¹¹Veah hott miah ebbes gevva, es ich een zrikk betzawla sett? Alles unnich em himmel is mei.

¹²Ich vill nau shvetza veyyich demm diah sei bay, vi grohs un shteik es eah is.

¹³Veah kann eem sei ausaht glayt abzeeya, veah dayt drauwa broviahra een ufzohma?

¹⁴Vee dayt ebbah drauwa di deahra funn sei maul uf macha, siddah es sei maul en ring mitt feichboahri zay hott?

¹⁵Shtols shtayn di roiya funn shields uf sei bukkel; si sinn in-nannah fesht gmacht.

¹⁶Ay roi is so nayksht zu di annah, es kenn luft zvishich si kumma kann.

¹⁷Si sinn fesht gmacht zu nannah; si henka zammah un kenna nett funn-nannah gedu sei.

¹⁸Vann eah aus di naws shneest, dutt di helling blitza, sei awwa sheina vi di sunn am uf kumma.

¹⁹Flamma kumma aus sei maul; feiyahrichi funka fleeya raus.

²⁰Shmohk kumd aus sei naws, so vi aus en kessel ivvah en feiyah.

²¹Sei ohften shtekt kohla oh, un's flamm kumd aus sei maul.

²²Graft is in sei hals, un angsht gayt fannich eem heah.

²³Di runsla in sei flaysh henka zammah, si sinn hatt zammah gegossa un ksetzt vi eisa.

²⁴Sei hatz is so hatt es en shtay, so hatt es da unnahsht meel-shtay.

²⁵Vann eah uf shtayt dann doon even di mechticha sich feicha; vi eah sich rumm shmeist sinn si fagelshtaht.

²⁶Vann en shvatt een dreft dann dutt's een nett vay, un aw nett en arrow un en langi adda en katzi shpiah.

²⁷Eisa is vi shtroh zu eem, un bronze vi fafauld hols.

²⁸Da arrow kann een nett macha shpringa, shling-shtay sinn vi shprau zu eem.

²⁹En globb-shtekka is vi en shtroh-shtubbel zu eem, un eah lacht vann shpiahs kshmissa vadda geyyich een.

³⁰Sei bauch hott shaufi shpitza vi fabrocha ksha, eah lost en pawt im drekk vi en dresha-shlayf.

³¹Eah shtatt da say uf vi vassah am kocha, vi en kessel mitt haysi shmiah.

³²Hinnich eem lost eah en sheinichi pawt im vassah, ma dayt denka da say veah veis-groh.

³³Nix uf di eaht is vi een, eah is gmacht unni furcht.

³⁴Eah gukt nunnah uf alles es hohch is, eah is kaynich ivvah awl di shtolsa diahra.”