Read Pennsylvania German Hiob 42 Bible Online

Hiob 42 - Pennsylvania German bible

Hiob 42

¹No hott da Hiob ksawt zumm HAH,

²“Ich vays es du alli ding du kansht, nimmand kann dich shtobba funn du vass du vitt.

³Du hosht kfrohkt, ‘Veah is dess es mei roht fashtekkeld unni fashtand?’ Ich habb geviss kshvetzt veyyich sacha es ich nett fashtanna habb, sacha es zu vundahboah sinn fa mich zu fashtay.

⁴Du hosht ksawt, ‘Heich mich ab, ich zayl shvetza; ich zayl dich sacha frohwa, un du gebsht miah andvat.’

⁵Mei oahra henn keaht funn diah, avvah nau henn mei awwa dich ksenna.

⁶Fasell nemm ich zrikk alles es ich ksawt habb, un du boos im shtawb un di esh.”

⁷Noch demm es da HAH dee sacha ksawt katt hott zumm Hiob, hott eah ksawt zumm Eliphas funn Theman, “Mei zann is hays geyyich dich un dei zvay freind. Dess is veil diah nett kshvetzt hend veyyich miah vass recht is vi mei gnecht da Hiob hott.

⁸So nau nemmet sivva bulla un sivva shohf-bekk zu meim gnecht da Hiob, un opfahret en brand-opfah fa eich selvaht. Mei gnecht da Hiob zayld bayda fa eich, un ich heich sei gebayt oh. Fasell doon ich nett mitt eich vi ich sett fa vass diah fadeend hend. Diah hend nett kshvetzt vass recht is veyyich miah vi mei gnecht da Hiob hott.”

⁹No hott da Eliphas funn Theman, da Bildad funn Suah un da Zophar funn Naamah gedu vass da HAH eena ksawt hott, un da HAH hott em Hiob sei gebayt ohgnumma.

¹⁰Noch demm es da Hiob gebayda hott fa sei drei freind, hott da HAH eem zrikk gevva vass eah faloahra katt hott. Un nett yusht vass eah faloahra hott, avvah zvay moll so feel es difoah.

¹¹Awl sei breedah un shveshtahra un selli es een gekend henn difoah, sinn kumma un henn broht gessa mitt eem in seim haus. Si henn eem zu kshprocha un een gedrohsht veyyich awl da druvvel es da HAH uf eem gebrocht katt hott. Yaydahs funn eena hott eem samm geld un en goldichah ring gevva.

¹²Da HAH hott's letsht dayl fumm Hiob sei layva may ksaykend es es eahshta. Eah hott fatzay dausend shohf, sex dausend kamayla, en dausend yoch oxa, un en dausend aysla katt.

¹³Eah hott aw sivva boova un drei mayt katt.

¹⁴Sei eahsht maydel hott Jemimah kaysa, es zvedda Keziah uns dridda Keren-Happuch.

¹⁵Neiyets im land voahra so shayni mayt kfunna es em Hiob sei mayt. Un iahra daett hott eena en eahbshaft gevva grawt mitt sei boova.

¹⁶Noch demm hott da Hiob nochamohl en hunnaht un fatzich yoah glaybt. Eah hott sei kinnah un kinds-kinnah ksenna biss in's fiaht gleet.

¹⁷Un so is da Hiob kshtauva vo eah en oahrichah aldah mann voah.