Read Pennsylvania German Hiob 5 Bible Online

Hiob 5 - Pennsylvania German bible

Hiob 5

¹“Roof nau, dutt ennich ebbah diah andvat gevva? Zu vels funn di heilicha zaylsht du drayya?

²Shpeit bringd da unksheit um, un fagunsht shlakt da dumm doht.

³Ich habb en unksheidah ksenna eivatzla vi en bohm, avvah ich habb en bletzlichah fluch uf sei haus gedu.

⁴Sei kinnah sinn veit funn aus di kfoah kalda, si faliahra iahra recht am doah funn di court, un nimmand macht si frei.

⁵Di hungahricha essa sei eahn, even's frucht es vaxt unnich di danna, un di dashticha shlukka sei geld uf.

⁶Dreebsawl kumd nett aus em shtawb, un druvvel kumd nett aus em grund.

⁷Doch en mann is geboahra fa druvvel, so shuah es di funka nuff-zuss fleeya.

⁸Vann's mich veah, dayt ich Gott ohroofa, un dayt mei sacha fannich een bringa.

⁹Eah dutt grohsi un unbegreiflichi sacha, vundahra es nett gezayld sei kenna.

¹⁰Eah gebt da reyyah uf di eaht, un shikt's vassah uf di feldah.

¹¹Eah haybt di niddahra hohch uf, un selli es heila hald eah aus di kfoah.

¹²Eah drayt zu nix selli es shlichtichi sacha du vella, un macht's so es iahra hend's nett ausdrawwa kenna.

¹³Eah fangd selli es mayna si sinn shmeaht mitt iahra aykni shkeems, un da roht funn di fafiahrah vatt kshvind nunnah gedrayt.

¹⁴Di dunkelheit kumd uf si deich da dawk; si feela iahra vayk in di mitt fumm dawk vi im dunkla.

¹⁵Eah hald di oahma vekk fumm shvatt in iahra maul, un aw funn di hand funn di mechticha.

¹⁶So henn di oahma hofning, un ungerechtichkeit muss sei maul zu macha.

¹⁷Da mann es gezankt is bei Gott is ksaykend, so fa'acht nett da shtrohf fumm Awlmechticha.

¹⁸Eah macht's vay, avvah eah bind's viddah uf, eah shlakt, avvah eah dutt's viddah hayla.

¹⁹Aus em druvvel nemd eah dich sex mohl; even sivva mohl dutt evil diah kenn shawda.

²⁰In hungahs-noht hald eah dich fumm doht, un im greek hald eah dich fumm shvatt.

²¹Du vasht fashtekkeld funn veeshti kshvetzah bei di zung, un brauchsht dich nett feicha vann fadeahvung kumd.

²²Du zaylsht lacha ivvah hungahs-noht un fadeahvung, un brauchsht dich nett feicha veyyich di vilda diahra.

²³Du zaylsht fridda havva mitt di shtay im feld, un bisht in fridda mitt di vilda diahra.

²⁴Du vaysht es dei tent nett nunnah falla zayld; du guksht ivvah dei sach, un alles is datt.

²⁵Du zaylsht vissa es dei kinnah feel sei zayla, un dei nohch-kummashaft so vi's graws uf di eaht.

²⁶Du kumsht an's grawb an en goodi eld, vi zeidichi vaytza-shayb an di eahn.

²⁷Miah henn dess ivvah-gegukt, un's is voah; so heich dess ab, un sayn vass es maynd zu diah.”