Read Pennsylvania German Hiob 6 Bible Online

Hiob 6 - Pennsylvania German bible

Hiob 6

¹No hott da Hiob ksawt,

²“Vann yusht mei angsht gvohwa sei kend, un awl mei dreebsawl uf en vohk gedu sei kend.

³Es veah geviss shveahrah es da sand am say nohch; fasell sinn mei vadda so grobb.

⁴Em Awlmechticha sei arrows shtekka in miah; mei geisht drinkt iahra gift. Ich binn fagelshtaht bei di sacha es Gott ufgleind hott geyyich mich.

⁵Dutt en vildah aysel greisha vann eah graws hott, adda dutt en ox bladda vann eah foodah hott?

⁶Vatt lebbich ess-sach gessa unni sals, adda hott's veis fumm oi ennichah flayvah?

⁷Ich du's nett fa's ohrayya; so ess-sach macht mich grank.

⁸Oh, vann ich yusht havva kend vass ich frohk difoah, un vass ich hoff difoah gevva veah zu miah bei Gott.

⁹Ich vott Gott veah villing fa mich doht drikka, es eah sei hand lohs lossa dayt un mich abshneida!

¹⁰No hett ich alsnoch deah drohsht: Ich kend mich froiya even in dee shmatza, veil ich di vadda fumm Heilicha nett falaykeld habb.

¹¹Vass fa grefta habb ich, es ich voahra sett? Vass zayld mei end sei, es ich geduld havva sett?

¹²Habb ich di grefta funn en shtay, adda is mei flaysh vi bronze?

¹³Habb ich di grefta fa miah selvaht helfa, nau siddah es mei hilf gnumma is funn miah?

¹⁴En mann sei freind sedda goot-maynich sei zu eem vann eah in druvvel is, even vann eah ufheaht da Awlmechtich firchta.

¹⁵Avvah diah, mei breedah, sind so zvay-ksichtich es en vassah-grikk, es drukka gayt vann's nett reyyaht.

¹⁶Ayni es dreeb vatt vann's ice shmelst, un es foll vatt vann da shnay shmelst.

¹⁷Vann's hays vatt heaht si uf lawfa, un in di hitz drayt si zu nix.

¹⁸Di leit mitt kamayla gayn ab funn iahra vayk; si gayn nuff an deah drukka blatz un fadashta.

¹⁹Di leit mitt kamayla funn Thema gukka fa vassah, di kamayla leit funn Saba gayn mitt hofning.

²⁰Si voahra nunnah glost fa si henn hofning katt, avvah si sinn datt anna kumma un voahra falossa.

²¹Diah aw hend ausgedrayt fa kenn hilf sei, diah saynet mei dreebsawl, un feichet eich.

²²Habb ich selayva kfrohkt fa en kshenk, adda eich kfrohkt fa en betzawles funn eiyah geld,

²³fa aus di kfoah gnumma sei funn mei feinda, adda aus di kfoah funn di mechticha?

²⁴Lannet mich, no binn ich shtill, veiset miah vo ich letz gedu habb.

²⁵Eahlichi vadda doon vay, avvah vass batt eiyah viddah-shtreit?

²⁶Maynet diah, diah zaylet recht setza vass ich sawk, un nemmet di vadda funn en bedreebdah mann vi yusht vind?

²⁷Diah daydet even shteklen zeeya im lohs fa kinnah greeya unni en daett, un daydet eiyah freind vekk fahandla.

²⁸Nau seind goot genunk un gukket an mich. Dayt ich leeya fannich eiyah ksicht?

²⁹Gevvet ei, seind nett unrecht, denket viddah, dess hott zu du mitt mei gerechtichkeit.

³⁰Denket diah ich binn am leeya mitt mei zung? Denket diah ich vays nett recht funn letz?”