Read Pennsylvania German Hiob 9 Bible Online

Hiob 9 - Pennsylvania German bible

Hiob 9

¹No hott da Hiob ksawt,

²“Yau, ich vays es awl sell voah is, avvah vi kann en mensh gerecht sei fannich Gott?

³Vann ebbah gleicha dayt shtreida mitt eem, kend eah eem nett ay moll aus en dausend moll andvat gevva.

⁴Eah hott grohsi veisheit un is mechtich, veah kann sich geyyich een shtella unni sich selvaht shawda du?

⁵Eah kann berga rumm setza un si vissa's nett, un kann si ivvah-drayya in seim zann.

⁶Eah shiddeld di eaht aus iahra blatz un macht iahra poshta ziddahra.

⁷Eah shvetzt zu di sunn un si sheind nett, un macht's licht funn di shtanna ausgay.

⁸Eah laynich dutt di himla ausshtrekka, un drett di vella fumm say nunnah.

⁹Eah macht da Beah, da Orion un di Pleiades, un aw awl di shtanna in di saut.

¹⁰Eah dutt grohsi sacha es nett begreiflich sinn, un vundahra es nett gezayld sei kenna.

¹¹Eah gayt an miah fabei, un ich kann een nett sayna, eah lawft fabei, un ich habb's nett acht.

¹²Vann eah ebbes vekk nemd, veah kann een shtobba? Veah kann sawwa, ‘Vass bisht du am du?’

¹³Gott dutt sei zann nett zrikk hayva, di helfah fumm Rahab missa sich beeya unnich sei fees.

¹⁴Vee soll ich eem dann andvat gevva? Vee kann ich vadda finna fa shvetza geyyich een?

¹⁵Even vann ich recht binn, kann ich eem kenn andvat gevva, ich kann yusht mei richtah frohwa fa bamhatzichkeit.

¹⁶Vann ich een roofa dayt, un eah dayt miah andvat gevva, dann kend ich alsnoch nett glawva es eah mich abheicha dayt.

¹⁷Eah dayt ivvah mich foahra mitt en shtoahm, un dayt mei vayyi blakka noch shlimmah macha unni uahsach.

¹⁸Eah dayt mich nett lossa mei ohften zrikk greeya, avvah eah dayt mich filla mitt dreebsawl.

¹⁹Vann's kumd zu macht un gvald, dann is eah mechtich; vann's kumd zu vass recht is, veah kann een bei roofa?

²⁰Vann ich sawk es ich gerecht binn, doch dutt mei ayya maul mich fadamma, diveil es ich unshuldich binn, dutt eah mich alsnoch shuldich hayva.

²¹Even diveil es ich unshuldich binn, gebb ich nix may um mei layva; ich hass mei ayya layva.

²²Es is alles ayns; fasell sawk ich, ‘Eah dutt di unshuldicha un di ungettlicha awl zvay umbringa.’

²³Vann unglikk bletzlich kumd un bringd da doht, dann dutt eah shpodda ivvah di unshuldicha.

²⁴Vann's land in di hend funn di ungettlicha fald, dann dekt eah di ksichtah funn di richtah zu. Vann's nett een is, dann veah is es?

²⁵Mei dawwa gayn kshvindah fabei es vi ebbah am shpringa, si fleeya fatt un sayna nix goodes.

²⁶Si gayn fabei vi shiffah es gmacht sinn funn vassah-shtengel, vi en awdlah es nunnah fleekt uf en diah.

²⁷Vann ich sawk, ‘Ich zayl mei beglawk fagessa, zayl ufheahra en lang ksicht havva, un zayl fraylich sei,’

²⁸dann dayt ich mich feicha veyyich mei shmatza, fa ich vays es du mich shuldich haybsht.

²⁹Siddah es ich shund shuldich kfunna binn, favass sett ich shtravla fa nix?

³⁰Even vann ich mich vesha dayt mitt shnay-vassah, un mei hend vesha dayt mitt lawk,

³¹daytsht du mich in en drekkich loch shmeisa, un mei aykni glaydah dayda mich hassa.

³²Eah is nett en mensh vi ich binn, es ich eem andvat gevva kann. Miah kenna nett mitt-nannah in's gericht-haus gay.

³³Es hott kenn middel-mann es zvishich uns kumma kann, un es sei hand uf uns layya kann.

³⁴Ich vott eah dayt sei shtekka vekk nemma funn miah, so es ich nimmi angsht hett funn eem.

³⁵No dayt ich shvetza un mich nett feicha veyyich eem, avvah ich selvaht binn nett aynah es so du kann.”